بایاتی

داغلاردا گؤردوم لالا،
الده توتدوم پیالا.
کیم گؤروبدو دۆنیادا،
ظۆلم ائوی آباد قالا؟

ایشیم دۆشدو دیوانا،
آخیر گلدیم من جانا.
هئچ واختی بئل باغلاما
بیر ایلانا، بیر خانا.

آل کمری، بئل باغلا،
ساچلارینا تئل باغلا.
نه یادا سیرّینی وئر،
نه نامرده بئل باغلا.

عاریف اولان سؤز قانا،
سؤز آنلایا، سؤز قانا.
یۆز مین تۆلکو یؽغیلسا،
نئیله‌یر بیر آسلانا؟

کامان بلا، اوخ بلا،
ائل گله‌لی یوخ بلا.
نامرد دوستلا توش اولسون،
باشین چکر چوخ بلا.

عزیزی‌یم مردانا،
سؤزوم دئدیم مردانا.
قورخاغا اوغول دئمز
قوچاق آتا، مرد آنا.

نهره‌نی چالخا سولا،
یاغ گرک قالخا، دولا.
آرخ چای دئییل، سو گله،
سو گرک آرخا دولا.

گۆنلری بیر-بیر سانا،
یاد وئردی بیر سیرّ سانا.
بیر علم، بیر ده صنعت
خزینه‌دیر اینسانا.

الیمده وار باغلاما،
من گئدیرم، آغلاما.
بلکه گئتدیم، گلمه‌دیم،
نامرده بئل باغلاما.

عزیزیم گۆلوستانا،
شئه دۆشوب گۆلوستانا.
آییق اول، شئیدا بۆلبول،
خار قونار گۆلوستانا.

توت آغاجین داراما،
الدن چؽخار باراما.
حالال زحمتله گلر،
حارام گئدر حاراما.

عزیزیم دالداسینا،
مرد ایگید دالداسینا.
نامرد آسلان اولسا دا،
سؽغینما دالداسینا.

خالقین پیسین دانیشما،
پیس دئمه‌یه چالیشما.
اؤز پیسینه عاریف اول،
اؤزگنکینه آلیشما.

بۆلبول قونار تاختینا،
گۆل آچیلار باختینا.
خسته‌نین تابی اولماز،
آرمود یئتر واختینا.

گۆن گئتدی داغ باشینا،
اؤرتوب دوواق باشینا.
کؤنول شاماما ایستر،
دولانار تاغ باشینا.

قوهوم هارا، یاد هارا،
بئل باغلاما اغیارا.
حیاسیز قونشون اولسا،
تئز کؤچ، جانین قورتارا.

بو داغلارین باشینا،
بۆلبول دۆشر قاشینا.
ماهیر اووچو دۆز وورار،
گۆلله آتماز بوشونا.

عزیزی‌یم سالماسا،
خویدان کؤچ، گئت سالماسا.
بنده بنده‌یه نئیلر،
فلک گؤزدن سالماسا؟

آشیق گئدر هر یانا،
سؤزون دئیر مردانا.
ایگیده اۆرک وئرر
برک آیاقدا مرد آنا.

من عاشیق بیلن اولسا،
قدرینی بیلن اولسا.
بیرلیگی توپ داغیتماز،
اونا سس وئرن اولسا.