بایاتی

داغدا اینکلر،
اوتدار، ایمکلر.
خونچالی بگلر
بو بالاما قوربان.

تۆستوسوز داملار،
ساری باداملار،
تنبل آداملار
بو بالاما قوربان.

چایدیر، دنیزدیر،
قولدور، کنیزدیر.
بالام هر ندیر،
منه عزیزیدیر.

آ داغداغانلار،
بۆلبول بوغانلار،
اوغلان دوغانلار
بو بالاما قوربان.

اوغول اۆرکدیر،
قؽزیل دیرکدیر.
گؤتورون، ساخلایین –
قؽزا گرکدیر.

داغداکی آتلار
قویروغون قاتلار.
گؤیچک آروادلار
بو بالاما قوربان.

مین تۆمن آزدیر،
قؽزدیر، او نازدیر.
وئرین بالامی –
حالی ناسازدیر.

بو بؤلوک آتلار،
چمنده اوتلار،
ارسیز آروادلار
بو بالاما قوربان.

قؽز بیر مارالدیر،
گؤزده قارالدیر.
حسرت چکه‌نین
رنگین سارالدیر.

باغریمدا توت نوباری،
یئمه‌یه توت نوباری.
سئودین، آلا بیلمه‌دین،
آدیمی توتما باری.

گؤزومون قاراسیننان،
یاش آخار قاراسیننان.
آدام دا ال چکرمی،
اؤز جیرپاراسیندان؟

یارالی‌یام، یازیغام،
درددن قلبی قازیغام.
من اؤلسم، سنه قوربان،
سن اؤلمه، من یازیغام.

بیر سس گلیر ائللردن،
شیرین-شیرین دیللردن.
تانری، بالامی ساخلا
آغیر آیلار، ایللردن.

قوچاقدی، شیردی بالام،
قیبله‌دی، پیردی بالام،
گل فلک، قؽیما منه،
یازیغام، بیردی بالام.

آه چکمه، سولارام من،
ساچلاریم یولارام من.
من اؤلسم، سنه قوربان،
سن اؤلسن، نولارام من؟

قره‌نفیلم، قالخارام،
آچیلماغا قورخارام.
گئجه جؽققیرین چؽخسا،
یئریمنن دیک قالخارام.

بالامی تانیرام من،
هر سؤزون قانیرام من.
یوخودا آه چکنده
اود توتوب یانیرام من.

قایا منم، داغ منم،
داغ اۆسته بولاق منم.
آرخان یوخ، کۆمکین یوخ،
سنه گؤز-قولاق منم.

بالامسان، بیر دنه‌سن،
صدفسن، دۆرده‌نه‌سن.
من اؤلسم، سنه قوربان،
سن اؤلمه، بیر دنه‌سن.

من بو درددن اؤلمرم،
درد-درده بؤلمرم.
عزیز جانیمدان دؤنسم،
بیر بالامدان دؤنمرم.