بایاتی

اوخونور ازن، بالا،
دور گئیین، بعضاً، بالا.
بویونا آنان قوربان،
تاپپاتاپ گزن بالا.

داغلارین لالاسینا،
گۆن دۆشوب تالاسینا.
باجیلار قوربان اولسون
قارداشین بالاسینا.

لایلاسی درین بالا،
یوخوسو سرین بالا.
تانریدان عهدیم بودور،
تویونو گؤروم بالا.

لایلاییم ائل باشینا،
سانجیلسین تئل باشینا.
سنی کیم ایسته‌مه‌سه،
قالماسین ایل باشینا.

لا-لای دئدیم یاتینجا،
گؤزلرم آی باتینجا.
جانیم زینهارا گلدی
سن حاصیله چاتینجا.

یاخامدان آل ممه‌نی،
توتماسین قال ممه‌نی.
آغلاما، عزیز بالام،
آغزینا سال ممه‌نی.

لا-لای دئدیم بویونجا،
باش یاستیغا قویونجا.
پارداخلان، قؽزیلگولوم،
بیر ایله‌ییم دویونجا.

ائله‌می سۆرمه منی،
چک گؤزه سۆرمه، منی.
اوشاق یاتمیر، آغلاییر،
آغزینا سۆر ممه‌نی.

بیر گۆل اکدیم بویونجا،
ایله‌مه‌دی دویونجا.
عؤمروم، گۆنوم اوزانسین
بو بالامین تویونجا.

نازلاسین دیلیم سنی،
بؤیوتسون ائلیم سنی.
مئیداندا آت اوینادان
بیر ایگید بیلیم سنی.

بالام یاتیر بئشیکده،
بۆلبول اوخور ائشیکده.
سن یات یوخون آلگیلن،
من دورموشام کئشیکده.

آتیبان توتدوم سنی،
عجب اوووتدوم سنی.
عؤمر اۆزدوم، جفا چکدیم،
شۆکور، بؤیوتدوم سنی.

ائوینده، ائشییینده،
یات قوزوم، بئشیگینده.
دان اولدوزو، بیر ده من
دورموشوق کئشی‌یینده.

قؽزیلگولون چاناغی،
آستانالار تورپاغی.
کیم بالامی ایسته‌مز،
گؤزونه بیبر یارپاغی.

آنان تئل دۆزر سنه،
باجین گۆل بزر سنه.
تانریدان عهدیم بودور،
دگمه‌سین نظر سنه.

بالامین ال یایلیغی،
اورتاسی زر یایلیغی.
هره بیر کره دئسین
بالاما جان ساغلیغی.

لا-لای چالدیم همیشه،
کاروان ائنر ائنیشه.
یاستیغیندا گۆل بیتسین،
دؤشه‌یینده بنؤوشه.

گؤیده اولدوز ناشیدی،
کیم بالامین یاشیدی.
قؽز گؤزومون قاراسی،
اوغلان اۆرک باشیدی.

بویا-بوخونا دول، گز،
بوینوما دولا قول، گز.
جاوانلار جرگه‌سینده
سن ده بیر ایگید اول، گز.

آتیم، توتوم بو بالانی،
شکره قاتیم بو بالانی.
آتاسی ائوه گلنده
قاباغا توتوم بو بالانی.