بایاتی

قؽش دولانیر، یاز گلر،
اؤردک گلر، قاز گلر.
اگر کاغیذ اولماسا،
یارپاق اۆسته یاز، گلر.

گئجه‌لر، خوش گئجه‌لر،
قوینو بوم-بوش گئجه‌لر.
یاری مندن آییردین،
آ باغری داش گئجه‌لر.

دریادان گمی گلر،
کۆر کؤچر، گمی گلر.
دویونجا باخ گؤزومه،
آیریلیق دمی گلر.

قؽزیلگولو دررلر،
مخمر اۆسته سررلر.
خوش او قؽزین حالینا،
سئودیگینه وئررلر.

قویونلار مه‌لر گلر،
داغلاری ائنر گلر.
یاریم وفالی اولسا،
گئجه‌نی بؤلر گلر.

یاراقلاری دۆزدولر،
هر طرفی سۆزدولر.
منیم نه واختیم ایدی،
الیم سندن اۆزدولر؟

پنجره‌دن داش گلر،
خومار گؤزدن یاش گلر.
سنی منه وئرسه‌لر،
هامی‌یا دا خوش گلر.

خوش گۆنو دۆزن گۆلر،
ائللری سۆزن گۆلر.
قورخورام یار آیاغین
اینجیتسین اۆزنگیلر.

من عاشیق گؤزوم ایشلر،
کابابا کؤزوم ایشلر.
باخارام یار یولونا،
نه قدر گؤزوم ایشلر.

شیرواندان کاروان گئدیر،
قاباقدا ساروان گئدیر.
اینتیظار گؤزلریمدن
گئجه-گۆندوز قان گئدیر.

بو گلن آه گتیرر،
گاه توتار، گاه گتیرر.
یاردان علی اۆزولن
کیمه پناه گتیرر؟

بو یولدان قازاخ گئدیر،
ائله بیل دوزاخ گئدیر.
یاریم دۆشوب یادیما،
خیالیم اوزاق گئدیر.

گۆلو باغدان-باغا سر،
مئیوه‌سین در، تاغا سر.
الیم الینه دگسه،
اۆرگیم زاغ-زاغ اثر.

قاب-قاجاق ایرفده‌دیر،
هره بیر طرفده‌دیر.
هر گۆن گؤردوگوم یاری
گؤرمورم بیر هفته‌دیر.

توفان گلر، داغ اثر،
یئل ووراندا باغ اثر.
یار یادیما دۆشنده
اۆرگیم زاغ-زاغ اثر.

سینه‌مده یارام ندیر؟
غم ایله آرام ندیر؟
دردیم غۆربت دردیدیر،
بس بونا چارام ندیر؟

باغبان باغدان بار ایستر،
هئیوا ایستر، نار ایستر.
منیم اینتیظار کؤنلوم
آلا گؤزلو یار ایستر.

بوردان اوزاق گنجه‌دیر،
زۆلفون پنجه-پنجه‌دیر.
اؤلوم بیردفه‌لیکدیر،
آیریلیق ایشگنجه‌دیر.

عاشیق اولان یار ایستر،
باغبان باغدان بار ایستر.
منیم بو خسته کؤنلوم
ال دگمه‌میش نار ایستر.

گلن قوناق گئدندیر،
گئتمه‌ییر او ندندیر؟
منی بئله سارالدان
بیر نازلی آغبه‌دندیر.