بایاتی

اود یانیر، گؤزده‌ین وار،
مجلیسده سؤزدئین وار.
عزرائیل، آلما جانیم،
یولومو گؤزده‌ین وار.

ائشیت سؤزوم دئییم، یار،
دونوم گؤندر گئییم یار.
سن گئده‌لی قالماییب
اۆرگیمده هئییم، یار.

نه اوجا داغلارین وار،
آل-یاشیل باغلارین وار.
غۆربت ائلدن تئز قاییت،
دالینجا آغلارین وار.

قوللاریم باغلایان یار،
اۆرگیم داغلایان یار.
گئتدیم، غۆربتده قالدیم،
یاش تؤکوب آغلایان یار.

اؤزون داغا سالدی قار،
قؽش دولاندی، قالدی قار.
ایسته‌دیم یئتم یارا،
یولو-ایرزی آلدی قار.

داغدا ندی، تۆستو یار،
آلدی دومان اۆستو یار.
آیریلدین، بیردن گئتدین،
گؤرن دئدی، کۆسدو یار.

من عاشیقم، آلما، یار،
آلیب یئره سالما، یار.
ال منیم، اتک سنین،
نظریندن سالما، یار.

گۆن گئدر، ساری قالار،
دوه اووساری قالار.
بیلسم نه یولدان گلیر،
گؤزوم یول ساری قالار.

کؤنول وئردیم، گئتدی یار،
مورادینا یئتدی یار.
یامان وفاسیز چؽخدی،
منی ناکام ائتدی یار.

داغ آشان دالدا قالار،
دینج باشیم قالدا قالار.
کؤچ دؤنسه غۆربت ائلدن،
گؤزلریم یولدا قالار.

دؤشنیبدی خلی، یار،
چوخاسی وزنه‌لی یار.
دوروم یوللارا باخیم،
وعده‌لیدی، گلی یار.

یولوم اولدو ایراقلار،
چینیم کسدی یاراقلار.
آیریلیق معلوم اولدو،
من آغلارام، یار آغلار.

قارشیمیزدا آلییار،
گئیینیبدی آلی یار.
غم چکمه، فقیر بی‌کس،
بیر گۆن کؤنول آلی یار.

اله آلمیش سانجاقلار،
دوست زۆلفونو سانجاقلار.
بابا، باغلار کۆنجونده
خان بۆلبول سنجه آغلار؟

آختارمادی ایزیم یار،
هارا گئتدی بیزیم یار؟
چوخ گؤزله‌دیم، گلمه‌دی،
قوجاقلادیم دیزیم، یار.

دریادا وار بالیقلار،
باغداددا خورمالیقلار.
نه بو وۆصال اولایدی،
نه ده بو آیریلیقلار!

آشیق یادینا باغلار،
خالین یادینا باغلار.
گئنه قوجا بۆلبولون
دۆشوب یادینا باغلار.

عزیزیم بیجا داغلار،
گۆندوزو گئجه داغلار.
سئوه‌سن وئرمه‌یه‌لر،
گؤره‌سن نئجه داغلار.

قارشیدا قارا باغلار،
گئج گلمیش قارا باغلار.
یادینا گئجه دۆشموش،
اۆزونو قارا باغلار.

آ داغلار اوجا داغلار،
دردبیلن قوجا داغلار.
قوی آختاریم یاریمی،
وئررم باج، آ داغلار.