بایاتی

اوجاغی قالارام من،
اود ووررام، قالارام من.
یاریم الیمه دۆشسه،
دوز کیمی یالارام من.

من گئدیرم، بیلگینن،
یول اۆستونده دورگینن.
آی دوستوم، گل یاخینا،
حالاللیغی وئرگینن.

اود توتوب یانارام من،
سیرّ سؤزون قانارام من.
سن گلدیگین واختی دئ،
گۆنلری سانارام من.

عزیزیم تئل اۆزوننن،
تؤکولوب تئل اۆزوننن.
بیواخت یولا سالدیلار،
دویمادیم گۆل اۆزوننن.

دریادا بیر داشام من،
گؤهرم من، قاشام من.
آرانی داغلار کسیب،
قانادیم یوخ آشام من.

سیرّیم وئرمه یادا سن،
یا من گلیم، یا دا سن.
جسدده جان تیتره‌یر
هر دۆشنده یادا سن.

گلمیشم سون قوشام من،
داغلارا قونموشام من.
آغلاما، ترلان کؤنلوم،
گلد-گئدر قوشام من.

گزه‌سن، شن گله‌سن،
عؤمرومه تن گله‌سن.
عزیز گۆن، عزیز گئجه،
قوناغیم سن گله‌سن.

چای دئییلم، آخیم من،
ائل-اوبانی یؽخیم من.
گیردیم یار باغچاسینا،
یار یوخ، کیمه باخیم من؟

عزیزی‌یم گۆله سن،
دانیشاسان، گۆله‌سن.
باغبان گئتدی، باغ سولدو،
حسرت قالدین گۆله سن.

گل ساچینی هؤروم من،
بیر-بیر بندین ووروم من.
ائیوانا چؽخ، باخ باری،
بیر اۆزونو گؤروم من.

قؽزیلگولو دره‌سن،
یایلیق اۆسته سره‌سن.
یئرین منه نیشان وئر،
آت گؤندریم گله‌سن.

عزیزی‌یم یاددان سن،
آشنادان سن، یاددان سن.
دیلیمین ازبریسن،
هئچ چؽخمازسان یاددان سن.

قوی مارال ایزه گلسین،
تالادان دۆزه گلسین.
عهدیم وار، یار بیر گئنه،
دولانسین بیزه گلسین.

جئیران، چؤله گئدیرسن،
اؤردک، گؤله گئدیرسن.
یارا بیر خبر آپار،
بیزیم ائله گئدیرسن.

عزیزی‌یم یاز گلسین،
قؽش چکیلسین، یاز گلسین.
سیفاریشله گلمه‌دی،
دردلی نامه یاز، گلسین.

باغا گیردیم، نار دئیین،
قؽزیلگوله خار دئیین.
گئجه-گۆندوز یولونو
گؤزله‌ییرم، یار، دئیین.

عزیزی‌یم یاز گلسین،
پاییز گلسین، یاز گلسین.
قؽش اؤتدو، یاز گلمه‌دی،
اۆمیدیم وار، یاز گلسین.

جاوان گلین، دول گلین،
اوللام سنه قول، گلین.
بو یول گئدر-گلمزدی،
گل، گؤزلرم یول، گلین.

یوخدان وارا یئتیرسین،
درده چارا یئتیرسین.
آرزوم بودو فلکدن،
یاری یارا یئتیرسین.