بایاتی

بو داغلار قار مکانی،
سار گلسه وار مکانی.
آلچالسین اوجا داغلار،
گؤرونسون یار مکانی.

تبریز یانی دۆز باری،
گؤ۱ه قالخیب حاصاری.
سن اوردا قال، من بوردا.
چکک بو اینتیظاری.

من عاشیق، مئه دومانی،
داغیدار مئه دومانی.
هامی‌نین مئهدی‌سی وار،
بس منیم مئهدیم هانی؟

من عاشیقم اۆز باری،
باغیندا وار دۆز باری.
نولایدی، یار گله‌یدی،
اوتورایدیم اۆز باری.

اززینم داغارانی،
کسیبدی داغ آرانی.
یاخشیدان اؤترو عاشیق
ها گزیر داغ، آرانی.

آراز، بوردان آخ باری،
ساللان باری، آخ باری.
حسرت قالما، گؤزلریم،
بیر دویونجا باخ، باری.

داغلاردا لالام هانی؟
ایچمه‌یه لالام هانی؟
هامی سالامات گلدی،
بس منیم بالام هانی؟

کابابا گؤزدن باری،
هاممال، گؤزده آنباری.
ایراق اولدوق کؤنولدن،
اولمایاق گؤزدن باری.

گل قاپیمی آچ، باری،
ائویمه نور ساچ، باری.
یاغی دوروب یوللاردا،
ائن داغلاری قاچ، باری.

در گتیر دسته ناری،
قوینوندا بسته ناری.
کؤنلوم سنی آرزولار،
نئجه کی خسته ناری.

قالانین یان دیواری،
اود توتوب یاندی باری.
گؤسترین یار چئشمه‌سین،
اۆرگیم یاندی، باری.

شیروانین شیرین ناری،
دادلیدی شیرین ناری.
سیزینکی سیزین اولسون،
گؤندرین بیزیم یاری.

بوینومدا وار میرواری،
گؤز یاشینی سیل باری.
گل اوتوراق دیز-دیزه،
بیر آز دانیش، گۆل باری.

آشیق ائلدن یوخاری،
شانا تئلدن یوخاری.
یارین کۆسوب گئتدیگی
اولور ایلدن یوخاری.

آراشقی‌نین دارداری،
گل باشیمین سرداری.
ائویمیزه گلمه‌سن،
قونشوموزا گل باری!

من عاشیق، سازدان آیری،
اوچار قو قازدان آیری.
یارین حسرتینده‌یم،
دۆشموشم یازدان آیری.

من عاشیق، یار دیاری،
بایقونون یار دیاری.
بیر یانا دورون داغلار،
گؤرونسون یار دیاری.

داغ آیری، دومان آیری،
قاش آیری، کامان آیری.
سئویشدیک، آیری دۆشدوک،
گزک بیر زامان آیری.

شیروانین بوز داغلاری،
توتوبدو توز داغلاری.
آرخام، کۆمکیم اولسا،
آشارام تئز داغلاری.

ایروان چاغالاسی،
یاندی باغریم آراسی.
بیر اوغلان، بیر قؽز اولسون،
بیر گۆللو داغ آراسی.