بایاتی

من عاشیق بیر آز بری،
گنجه‌دن بیر آز بری.
کؤنلومون بیر دیله‌یی،
دیلیمین بیر ازبری.

اووچو، دولان اۆست داغی،
اووو گؤزله، پوس داغی.
یارین فراقیندا من،
اولموشام غم دوستاغی.

عزیزیم، بعضاً، یئری،
گئی، ساللان، بعضاً، یئری.
نولا من ده گزه‌یدیم،
یار گلیب گزن یئری.

دومان بۆرودو داغی،
داغلاری توتدو یاغی.
آختاردیم راست گلمه‌دی،
نه اؤلوسو، نه ساغی.

ائله‌می یارا یاغی،
یار اولوب یارا یاغی.
آستانامی توز باسیب،
کسیلیب یار آیاغی.

بو داغلار غم داغیدی،
چک هله، غم داغیدی.
سندن گلن خوش خبر
دریاجا غم داغیدی.

اۆرگیم آه بولاغی،
گؤزلریم شاه بولاغی.
غۆربتده یار سئوه‌نین
قارا گلسین دوواغی.

بو باغلار اولمایایدی،
سارالیب سولمایایدی.
بیر آیریلیق، بیر اؤلوم،
هئچ بیری اولمایایدی.

مۆشتاغی‌یام، مۆشتاغی،
عنبر زۆلفون مۆشتاغی.
اۆزوم اۆزون حسرتی،
گؤزوم گؤزون مۆشتاغی.

عمیم اوغلو قالایدی،
بو-بوخونا دولایدی.
هؤره‌یدیم ساچلاریمی،
بلکه منی آلایدی.

پنجره‌نین ایشیغی،
اولدوم گؤزون آشیغی.
گئدیرسن، گئت، تئز قاییت،
ائویمین یاراشیغی.

آی باتیب، گۆن اولایدی،
زۆلفون دۆگون اولایدی.
سننن کئچن گۆنلرین
بیری بو گۆن اولایدی.

یالقیز آغاج یالدادی،
داغلار اونا دالدادی.
دئمیرسنمی، آی ظالیم،
گؤزلریمیز یولدادی.

آغاجدا بار اولایدی،
مئیوه‌سی نار اولایدی.
ایکیمیز بیر کؤینکده،
کؤینک ده دار اولایدی.

ککلیک گزیر، کولدادی،
چایین سویو قولدادی.
اۆمیدیم اۆزمه‌میشم،
هله گؤزوم یولدادی.

داغلاردا قار اولایدی،
دون ووروب خار اولایدی.
دیل بیلن، سؤز آنلایان
بیر نازلی یار اولایدی.

یاریم دوعا یوللادی،
سالدی سویا یوللادی.
اؤزو گله بیلمه‌دی،
سلام-دوعا یوللادی.

تورون دریادا قالدی،
ایشین فریادا قالدی.
اؤلرسم، اؤلوم حاقدی،
حئیف، یار یادا قالدی.

بو داغدا مارال آزدی،
اووچو چوخ، مارال آزدی.
آغلاما، خومار گؤزلوم،
اؤلمرم، یارام آزدی.

گۆن قالخدی گؤیده قالدی،
گؤزوم او اؤیده قالدی.
خوش گۆن سنینله گئتدی،
باشیمدا سئودا قالدی.