بایاتی

تبریز اۆستو میانا،
قؽزیلگوله بویانا.
اوخو، بۆلبولوم، اوخو،
بلکه یاریم اویانا.

گۆن گئتدی داغ باشینا،
یار اؤرتوب آغ باشینا.
اوغلان شاماما ایستر،
دولانار تاغ باشینا.

اینه سانجدیم دیوارا،
ائلچی گؤندردیم یارا.
ائلچی‌یه زاوال اولماز،
اؤزوم ائلچی‌یم یارا.

نارینجا باخ، نارینجا،
ال وورما سارالینجا.
منده اۆرک قالمادی
یار کؤنلونو آلینجا.

شالینی آلما قارا،
باشینا سالما قارا.
گئتمیشدیم یار سئومه‌یه،
دۆشدوم من قالماقالا.

نارینجا باخ، نارینجا،
ساخلارام سارالینجا.
شاما دؤندو اۆرگیم
سندن جاواب آلینجا.

عزیزیم آلما قارا،
گئیمه‌یه آلما قارا.
خلوتده بیر یار سئودیم،
کیم سالدی قالماقالا؟!

گؤز اۆسته قویوب پاپاق،
گزیر ائلده کئیفی چاغ.
مندن اۆزون دؤندریب،
اۆرگیمه چکیب داغ.

عزیزی‌یم یار یارا،
قارا باغریم یار یارا.
او گۆن بایرامین ائیلر،
قیسمت اولسا یار یارا.

آغاج باشیندا پاراق،
یارین الینده یاراق.
گلسین، آچیم قلبیمی،
بو سؤودادان قورتاراق.

بیر اوخ آتدیم شیکارا،
شیکار دۆشوبدو دارا.
خوش گۆنون واریثی‌یم،
درد-غم هارا، من هارا؟

باشیمدا ساری سانجاق،
یاری گۆل، یاری سانجاق.
منی سنه وئرمزلر،
گرک من قاچیم آنجاق.

سو گلیر قالخا-قالخا،
تؤکولور بیزیم آرخا.
آرزو-کام یئتیشیبدیر،
بیلدیرین تویو خالخا.

بو دره‌دن قاز گئده،
قاققیلداشا، تئز گئده.
تانری‌یا روادیرمی،
دول کیشی‌یه قؽز گئده؟

سو گلیر، دولور چارخا،
تؤکولور بیزیم آرخا.
بوردا بیر یار سئومیشم،
قارداشدان قورخا-قورخا.

اوتورموشدوم سکیده،
اۆرگیم سک-سکیده.
یاردان اۆچ آلما گلدی
بیر قؽزیل نلبه‌کیده.

آرمود آغاجی هاچا،
الیم دولاشدی ساچا.
بیر مرد اوغلان ایسترم،
منی گؤتوره قاچا.

میخک اکدیم لینده،
میخک بوینون اینده.
بیر جۆت قوربان دئمیشم،
الیم الینه دگنده.

چیچک اکدیم لینده،
چیچک بوینون اینده.
من بیر قوربان کسرم
علی الیمه دگنده.

داغلار باشیندا لاله،
الینده وار پیاله.
من سنینم، آی اوغلان،
دۆشمه اؤزگه خیاله.