بایاتی

قره‌نفیلی درنده،
دریب یئره سرنده.
یارا کؤنلومو وئررم،
منه کؤنول وئرنده.

یولوم دۆشدو یاد ائله،
زۆلفوم گۆنده یاد ائله.
چوخان سنه یاراشیر،
یا بعضاً گل، یا بئله.

بیر قؽز گؤردوم بیچینده،
ساری سۆنبول ایچینده.
بوردا بیر توی اولاجاق،
گلن آیین ایچینده.

یول دۆشدو کندبیله،
تئهرانا، کندبیله.
بیکامال دئییل عاشیق،
اجلی گئنده بیله.

بیر اوغلان وار بیچینده،
ساری سۆنبول ایچینده.
نولا اونو گؤره‌یدیم
بو هفته‌نین ایچینده.

من عاشیق یاریمگیله،
قان قالیب یاریم گیله.
تانری سبب سالایدی،
گئده‌یدیم یاریمگیله.

گۆلو آتدیم دنیزه،
باتدی چؽخمادی اۆزه.
نولا بیزیم باغچادا،
یار گله بیر گۆن بیزه.

تانری، منی قوش ائیله،
قانادیم گۆموش ائیله.
دار یولدا، دار کۆچه‌ده
یاری منه توش ائیله.

یاریمین آدی میرزه،
گؤندرمیشم تیفلیسه.
سووقاتین ایسته‌میرم،
ساغلیغی گلسین بیزه.

گیردیم باغا اۆزومه،
تیکان باتدی دیزیمه.
اگیلدیم چؽخارتماغا،
یار گؤروندو گؤزومه.

قؽزیل اۆزوک فیروزه،
گئدین دئیین خوروزا.
بو گئجه بانلاماسین،
یار گله‌جکدیر بیزه.

داغا یاغیر قار یئنه،
اوو اوولاییر سار یئنه.
بیلمیرم نیه منی
بگنمه‌ییر یار یئنه؟

بیتیبدیر داغدا لالا،
اوخشور گۆل اۆزده خالا.
صیدقینن سئون اۆرک
آخیر چاتار وۆصالا.

عزیزی‌یم یار یئنه،
یارالاندیم، یار، یئنه.
گؤر نه گۆنه قالمیشام،
مندن قاچیر یار یئنه.

باغ سالمیشام یول اۆسته،
مئیوه‌سی وار بول اۆسته.
گئدیرم یار گؤرمه‌یه،
یاغی دوروب یول اۆسته.

داغدان گلدیک ایکیمیز،
زرلی یورغان یۆکوموز.
تانری مطلبین وئرسین،
بیر گؤروشک ایکیمیز.

بیر جۆت قوش وار گۆل اۆسته،
بیر جۆت گؤز وار یول اۆسته.
الله، منی اؤلدورمه،
تویوم واردیر ایل اۆسته.

قره‌نفیلم، قلمسیز،
قراریم گلمیر سنسیز.
قوینوندا قار-بوز اولسون،
نئجه یاتیرسان منسیز؟!

لامپا اۆستونده شیشه،
گۆل اۆستونده بنؤوشه.
الهی، یادا سالاق،
بلکه سئون یار دۆشه.

بوستان اکدیم خیارسیز،
گۆلون درمرم یارسیز.
گئجه یوخودا گؤردوم،
آییلدیم ایختیارسیز.