بایاتی

سرین مئه، گؤزل آیاز،
هئی اسیر گؤزل آیاز.
قلمینه من قوربان،
گؤزه‌لی گؤزه‌له یاز.

گؤزوم او گلنده‌دی،
خنجری بئلینده‌دی.
من آغلارام، او گۆلر،
اینصاف اؤز الینده‌دی.

عزیزیم اودا سالماز،
او خویدور، او دا سالماس.
سمندر ده منیمتک
اؤزونو اودا سالماز.

گؤیده اولدوز بللیدی.
گاه یۆزدو، گاه اللیدی.
من یاریمی گؤرموشم،
شوه قارا تئللیدی.

باغدا بیان تاپیلماز،
گۆله زیان تاپیلماز.
سونسوزون پیس گۆنونده،
یازیق دئین تاپیلماز.

اوخ آتدیم، آییم گلدی،
سانادیم، ساییم گلدی.
یار گؤندرن خونچادا،
منیم ده پاییم گلدی.

ال یایلیغی آچیلماز،
ساچاقلاری ساچیلماز.
بو منیم سؤنموش کؤنلوم،
یار گؤرمه‌سه آچیلماز.

داغ باشینا بار گلدی،
دئمه آهو-زار گلدی.
قارداشی گؤزله‌ییردیم،
بیر ده گؤردوم یار گلدی.

زۆلفون قارارا یئتمز،
دردین سینه‌مدن گئتمز.
سنی گؤرن گؤزلریم
اؤزگه‌یه نظر ائتمز.

آلما آتدیم، نار گلدی،
کتان کؤینک دار گلدی.
قاپی‌یا کؤلگه دۆشدو،
ائله بیلدیم یار گلدی.

داغ آشدی، لئیلی گئتدی،
لئیلی‌نین مئیلی گئتدی.
گؤزله‌دی یار گلمه‌دی،
کۆسوب، گیلئیلی گئتدی.

گؤی آت یاللارام سنی،
گۆموش ناللارام سنی.
منی یارا یئتیرسن،
مخمر چوللارام سنی.

یار داغدان آشدی گئتدی،
اۆرگی داشدی گئتدی.
آختاردیم، سوراقلادیم،
دئدیلر، قاشدی گئتدی.

آتدی بو باغلار سنی،
اود قویار داغلار سنی.
اغیارا همدم اولدون،
گؤز گؤرجک آغلار سنی.

بوردان تبریزه کیمی،
قار یاغار دیزه کیمی.
بیر دؤزموسن، بیر ده دؤز
گلن پاییزا کیمی.

ائله‌می داغلار سنی،
قار گلر باغلار سنی.
دۆشمن گؤرر، شاد اولار،
دوست گؤروب آغلار سنی.

سولار گلدی نیل کیمی،
قاشلار دوروب میل کیمی.
هر صاباح بویون گؤرسم،
قلبیم آچار گۆل کیمی.

بو داغلارین مئشه‌سی،
ایلیدیر بنؤوشه‌سی.
کؤنولسوز گئدن قؽزین
آغلاماقدیر پئشه‌سی.

ساری قووون دیلیمی،
اوچورتما بۆلبولومو.
گل قاپی دالداسینا،
دئییم درد-دیلیمی.

بو یئرده یول یاریدی،
یولچو یولدا قاریدی.
من سئودیگیم چالپاپاق
باشیمین سرداریدی.