بایاتی

الینده ناغاراسی،
دولاشیر باغ آراسی.
کؤنول سئون گؤزلین
نه آغی، نه قاراسی.

باغچالاردا ساری گۆل،
یاری قؤنچه، یاری گۆل.
نیشانلین صاباح گلیر،
باری سئوین، باری گۆل.

آی دئییلم، اولدوزام،
گلین دئییلم، قؽزام.
قاپیدا دوران اوغلان،
گل یانیما، یالقیزام.

ناچارام ها ناچارام،
باغلی قاپی آچارام.
یاریم جاوان اولماسا،
باش گؤتوروب قاچارام.

قارا آتین نالی‌یام،
قارا قاشین خالی‌یام.
چکمه جفامی، اوغلان،
من اؤزگه‌نین مالی‌یام.

تخت اۆستونده یاتمیشام،
الیمده شام توتموشام.
یادیما یار دۆشوبدور،
دۆنیانی اونوتموشام.

قارا آتین نالی‌یام،
گؤیچک قؽزین خالی‌یام.
منی بیر اوغلان سئویر،
چوخداندیر کی، حالی‌یام.

آغ دونو آغارتمیشام،
قوللارین دارالتمیشام.
اؤزوم قارابوغدایی،
چوخلارین سارالتمیشام.

دردین درمانی اوللام،
گۆلون خؽرمانی اوللام.
سن بویدا، سن بوخوندا
گؤرسم، قوربانی اوللام،

داغلارین قاشی منم،
اۆستونون داشی منم.
مهله‌میزده قؽز چوخدور،
هامی‌نین باشی منم.

کیشمیری شالین اوللام،
اۆزونده خالین اوللام.
ایلقارین دۆزگون اولسا،
وفالی یارین اوللام.

چای آشاغی گئتمرم،
چادرامی یئللتمرم.
خوروزگؤز اوغلان گرک،
دول کیشی‌یه گئتمرم.

قؤنچه گۆلم، باغدانام،
بنؤوشه‌یم، داغدانام.
بوستانچیدان خبر آل،
دئسین هانسی تاغدانام.

بنؤوشه‌یم، من ترم،
کول دیبینده بیترم.
گؤزله‌یرم، گلمه‌سن،
بوینو ایری بیترم.

باغا گیرمیشجن وارام،
گۆلون درمیشجن وارام.
یاری یوخودا گؤردوم،
اؤزون گؤرموشجن وارام.

آل-یاشیل گئیینمیشم،
داغدان دۆزه ائنمیشم.
قوهوم-قارداش وار اولسون،
یاری من بگنمیشم.

قارا آتی باغلارام،
گۆل دیبینده ساخلارام.
اؤزوم دئین اولماسا،
گئجه-گۆندوز آغلارام.

آرخالیغی بیچمیشم،
اۆستونده آند ایچمیشم.
یۆز گؤزلین ایچینده
تکجه سنی سئچمیشم.

یاریم یاد اولدو منیم،
عؤمروم باد اولدو منیم.
یاریم اؤزگه‌نین اولدو،
بدنام آد اولدو منیم.

اللرین آلدیم، اوغلان،
قوینوما سالدیم، اوغلان.
وعده وئردین، گلمه‌دین،
اینتیظار قالدیم، اوغلان.