بایاتی

عزیزیم من ده یئتیم،
سن یئتیم، من ده یئتیم.
هامی آرزویا یئتدی،
گۆن اولسون من ده یئتیم.

اووچو وئرمه‌دی آمان،
تورونا دۆشدو ترلان.
یارلا پئیمان باغلاییب،
قویموشام یولوندا جان.

آشیق شیرین جامالیم،
وئرسین شیرین جام، آلیم.
قونشودا بیر قؽز سئودیم،
اودور شیرینجه مالیم.

قؽزیلگولسن، بوتاسان،
منی سالما اودا سن.
من او گۆلدن دئییلم،
ایله‌یه‌سن، آتاسان.

تالادا قوزو گؤردوم،
بیر مارال ایزی گؤردوم.
ائندیم بولاق اۆستونه،
سئودیگیم قؽزی گؤردوم.

آی قؽز، کیمین قؽزیسان؟
آلمادان قؽرمیزیسان.
آتان-آنان بسله‌میش،
بختیمین اولدوزوسان.

آراندا قوزو گؤردوم،
تۆکو قؽرمیزی گؤردوم.
آچدیم جنّت قاپی‌سین،
سئودیگیم قؽزی گؤردوم.

ائله‌می اۆزه سانجان،
زۆلفونو اۆزه سانجان.
یارین وفالی اولسا،
یولوندا اۆزه‌سن جان.

سویون بندینه قوربان،
یارین فندینه قوربان.
یار آتینی یهرلر،
سینبندینه قوربان.

نارینجان، های نارینجان،
ساخلارام سارالینجان.
عاشیقه اؤلوم خوشدور،
یارا حسرت قالینجان.

مارالدانام، مارالدان،
دۆشموشم من قارالدان.
نه دردیم وار، نه غمیم،
سنسن منی سارالدان.

عزیزی‌یم قوو مندن،
چاخماق سندن، قوو مندن.
یۆز ایلین اووچوسویام،
یئنه قاچیر اوو مندن.

کؤینگی یاشیل اوغلان،
گئیین، یاراشیر، اوغلان.
بیزیم باغدا دولانما،
آنام دالاشیر، اوغلان!

آغ آت گلیر ائنیشدن،
سینبندی گۆموشدن.
بیزه ده قیسمت اولسون
هئیبه‌ده‌کی یئمیشدن.

اوغلان گلیر ائنیشدن،
کمربندی گۆموشدن.
یار ایله مرجیمیز وار،
من دوداقدان، او دیلدن.

قارداش، گل، کۆمکیمسن،
آرزومسان، دیله‌ییمسن.
باشقا گۆنده گلمه‌سن،
بو گۆن گل، گره‌ییمسن.

ساماواری قورگیلن،
بورغوسونو بورگیلن.
اگر منیم یاریمسان،
گل قارشیمدا دورگیلن.

من عاشیقم پری سن،
ائللرین شاهپریسن.
کؤنلومون بیر آرزوسو،
دیلیمین ازبریسن.

عزیزی‌یم بیر ده من،
دولدور ایچیم، بیر ده من.
عؤمور کئچدی، گۆن کئچدی،
جاوان اولمام بیر ده من.

دۆشوبدو مئیلی، دئیین!
اولوب گیلئیلی دئیین.
عشقین دیوانه‌‌سی‌یم،
گزیرم، لئیلی، دئیین!