بایاتی

میخک اکدیم مرزه من،
باغلامادیم درزه من.
پیس گۆنلرین الیندن
کیمه یازیم عرضه من؟

الینده بایدا گلین،
دوروبدو چایدا گلین.
تانری مطلبین وئرسین
بو گلن آیدا گلین.

دریادا فانارام من،
اود توتوب یانارام من.
قاش آلتدان گؤز ائیله‌مه،
عاریفم، قانارام من.

قارا شوساچ گلین،
دور قاپینی آچ گلین.
آتان سنی وئرمه‌ییر،
کهری مین قاچ، گلین.

سایادام، دورارام من،
بوینومو بورارام من.
هاردا بیر ترلان گؤرسم،
اونا تور قورارام من.

آشیق، ندیر عیلّتین؟
اۆرکده وار نیتین.
منی حئیران قویوبدور
شیرین سؤزون، صؤحبتین.

قاپیندا اینله‌ییم من،
سؤزون دئ دینله‌ییم من.
قوی آخسین گؤزوم یاشی،
بیر آز سرینله‌ییم من.

چالخا-چالخا، یاغ اولسون،
ایچ، داماغین چاغ اولسون.
آ قایتانقاش بالدیزیم،
قوی قارداشین ساغ اولسون.

سولار گلیر لیلینن،
بۆلبول اوینار گۆلونن.
بیر سؤز دئدیم، کۆسدو یار،
کؤنلون آلدیم دیلینن.

ایستکانین آغ اولسون،
ایچی دولو یاغ اولسون.
اوغلان، خیففت ائیله‌مه،
منیم جانیم ساغ اولسون.

الینده هانا گۆلدون،
یان اؤتدون، یانا گۆلدون.
من سنینچون آغلادیم،
سن ندن منه گۆلدون؟

اۆزر گؤلده سونالار،
سونام گلر، جان آلار.
عهد-پئیمان باغلادیق،
قوی سئوینسین آنالار.

عزیزیم دیشده نه وار؟
قان دوروب، دیشده نه وار؟
گۆلدون آغلیم آپاردین،
دئ بو گۆلوشده نه وار؟

آری بالدان گۆل اوولار،
اووچولار مارال اوولار.
گؤزون گؤزومه دگدی،
جانا سالدی یالوولار.

من عاشیق گؤزوموز وار،
کابابا کؤزوموز وار.
بیز ده گؤزل گؤرموشوک،
بیزیم ده گؤزوموز وار.

آ داغلار، بیزیم داغلار،
سیزه وار سؤزوم، داغلار.
قوربانام قارا گؤزلو
یاریما اؤزوم، داغلار.

باغدا پۆسته یئری وار،
پۆسته اۆسته یئری وار.
بیزه گلن قوناغین
گؤزوم اۆسته یئری وار.

عزیزی‌یم آغ داملار،
آغ ائیوانلار، آغ داملار.
یار مندن اۆز دؤندرسه،
گؤزلریمه آغ داملار.

آشیق گلیر، سازی وار،
غمزه‌سی وار، نازی وار.
هر باهارین بیر قؽشی،
هر قؽشین بیر یازی وار.

آراز آخار، بورولار،
سویو داشدا دورولار.
اۆرکده آرزون اولسا،
سنه ده توی قورولار.