بایاتی

آغاجدا قارماغین وار،
الده بئش بارماغیم وار.
یئتیملریمدم اؤترو
سنه یالوارماغیم وار.

قارداشلار، های قارداشلار،
یاغیش یاغار، قار باشلار.
اؤلسه باجیلار اؤلسون،
هئچ اؤلمه‌سین قارداشلار.

سؤزو سؤزدن آلان وار،
زۆلفون اۆزه سالان وار.
گؤزل اوغلان، تئز بؤیو،
گؤزو یولدا قالان وار.

دریادا چؽراق یانار،
باخدیقجا ایراق یانار.
یار یارینا قوووشسا،
دوست گۆلر، قؽراق یانار.

ساوالانین دۆزو وار،
اۆستونده سال بوزو وار.
بئله کی یار ساللانیر،
اۆرگینده سؤزو وار.

دییرمان اۆستو چینار،
یارپاغی دینار-دینار.
یاریم هله اوشاقدیر،
سؤز دئمه، قلبی سؽنار.

آشیق الده ساز آپار،
عیشوه گتیر، ناز آپار.
قؽشدا آداخلانمیسان،
تویون ائله، یاز آپار.

دۆزولوب سانا دیشلر،
باتیبدیر قانا دیشلر.
ائله بیل میرواریدیر،
دوروب یان-یانا دیشلر.

یاشیم اۆزومدن گئدر،
آخار گؤزومدن گئدر.
چکمه‌یین اوغلان آدی،
آغلیم اؤزومدن گئدر.

یاشیل گئییب ائنیشلر،
سارالیب آغ یئمیشلر.
سیرم-سیرم دۆزولوب،
دوروب میرواری دیشلر.

ایگید مینر آت، گئدر،
آت دئمه، موراد گئدر.
یاخشی قؽزین جئهیزی
بگلره سووقات گئدر.

قلبیم سنین ائویندیر،
گل قلبیمی سئویندیر.
سندن یۆز-یۆز یارام وار،
هره‌سی بیر تئلیندیر.

گؤیده اولدوز شاه گئدر،
گاه ایلنر، گاه گئدر.
من ایسته‌ین اوغلانین
قاباغیندا شاه گئدر.

عزیزیم منی دیندیر،
خوش خبر دئ، سئویندیر.
من کی سنی سئویرم،
واریم-یوخوم سنیندیر.

سرچه‌لر آلا گزر،
دالینجا بالا گزر.
چیرکین اۆزون گیزلدر،
گؤزل بودالا گزر.

چای آشاغی بوز گلیر،
دسته-دسته قؽز گلیر.
بیر الینده چؤرک وار،
بیر الینده دوز گلیر.

اوخون قالخانا دگر،
آتما، قالخانا دگر.
یار دردی منه دگدی،
گؤرن خالخا نه دگر.

داغ اۆسته بوران گلیر،
قارلاری سوران گلیر.
آتین دؤردنالا چاپیر،
آرخامدا دوران گلیر.

الکلر، آی الکلر،
چؽرمانسین آغ بیلکلر.
خبر گئتسین دوستلارا،
حاصیل اولسون دیلکلر.

اووچو بره‌دن گلیر،
داغدان، دره‌دن گلیر.
داغدا قار یوخ، بولود یوخ،
بو سئل هارادان گلیر؟