بایاتی

قارداش گلیر ائنیشه،
یولو دؤنوب گۆموشه،
قارداشا قؽز تاپمیشیق،
اۆزده خالی بنؤوشه.

باغچادان گۆل اۆزه‌یدیم،
تئللریمه دۆزه‌یدیم.
قارداشیمین تویوندا
بیر دویونجا سۆزه‌یدیم.

بایدانین قایماغیننان،
قابلارا یایماغیننان.
قارداشیم بیر قؽز سئویب
قاراباغ اویماغیننان.

بو ائولر بیزیم ائولر،
ایچینده اولسون تویلار.
یؽغیلسین قؽز-گلینلر،
اویناسین پۆسته بویلار.

دور آیاغا، قؽز گلین،
تئللرینی دۆز، گلین.
تویچولارا، یاخین گل،
دۆش اورتایا سۆز، گلین.

الینده سووچا گلیر،
سو دولو دولچا گلیر.
قارداشیمین تویونا
باشلاردا خونچا گلیر.

اولدوز گلین، آی گلین،
اولماز سنه تای، گلین.
قارداشی‌نین تویودور،
نازیک یوخا یای گلین.

داغ آشیر، کئچی گلیر،
کئچی‌نین اۆچو گلیر.
دور چؽخاق تاماشایا،
یاریمین کؤچو گلیر.

گلین، صلاتین گلین،
گئییب خلعتین گلین.
چاتیب اوغلان ائوینه،
آلیب مورادین گلین.

بو گۆن آیین اونودور،
زرخارادان دونودور.
قوربان اولوم قارداشا،
بو گۆن اونون تویودور.

من عاشیق خلی باغلار،
دؤشنمیش خلی باغلار.
توی گۆنو یارین بئلین
بیر جاوان علی باغلار.

اۆستونده‌کی آیا باخ،
بو ائوده‌کی تویا باخ.
تویدا دوستوم اویناییر،
حالال اولسون، بویا باخ.

اوتورموشدوم دالاندا،
صبیر گلدی دوراندا،
اوغلان، الین قوروسون،
منه شیلله ووراندا.

بۆلبول گله، باغ دولا،
ترلان قونا، داغ دولا.
یاریما کج باخانین
گؤزلرینه آغ دولا.

گۆن چکیلیب باتاندا،
گۆندوزه شر قاتاندا.
اووچو، الین قوروسون،
مارالا اوخ آتاندا.

الیمه یاخدیم حنا،
سؤزوم دئدیم یار قانا.
عؤمور-گۆن کی پیس کئچیر،
داغیلسین قوی زامانا.

او قؽزی باخ، او قؽزا،
چپردن باخیر بیزه.
قؽزی بیزی وئرمسز،
آخیرت اولماز سیزه.

سئودیگیم، زۆلفو قارا،
قاش قارا، زۆلفو قارا.
اگر منه گلمه‌سن،
تاپشیررام زۆلفوقارا.

قارشیدا یامان بالا،
دیل وورما، یامان بالا.
ظابیط دئر: گؤروم دگسین
یامانا یامان بلا.

آشیق اؤزون دئ یارا،
اۆرک سؤزون دئ یارا.
یاری مندن ائیله‌ین،
دۆشسون ایتکین دیارا.