بایاتی

گلدی بیر آی دا گئتدی،
جانیم آخ-وایدا گئتدی.
کاماندان اوخ تۆکندی،
الیمدن یای دا گئتدی.

عزیزیم یاسامالی،
خاللارین یاسامالی.
منی یاردان ائدنین
تؤکولسون یاسا مالی.

قره‌نفیل هاچابتدی،
سایمادیم نئچه بتدی.
دۆشسن منیم دردیمه،
گؤررسن نئجه درددی.

عزیزیم بو مئیدانی،
گزرم بو مئیدانی.
گئدنلر گئری گلمز،
چؤل اولسون بو مئیدانی.

داغدا ایتیردیم ایزی،
یار قویدو گئتدی بیزی.
قارا دوواقلی قالسین
یاری اؤیردن قؽزی.

عزیزی‌یم آیرانی،
شانا زۆلفون آیرانی.
دۆنیادان کام آلماسین
سنی مندن آیرانی.

عاشیق یارا خبری،
بایقو، یارا خبری.
اؤلسون یارالی جانیم،
گئتسین یارا خبری.

عاشیقم اؤز مزاری،
شان بالدان اۆزمز آری.
ایتیره‌سن قبریمی،
گزه‌سن یۆز مزاری.

داغلارین وار مه‌لری،
دیبینده ایده‌لری.
کاسیبا قؽز وئرمیرلر،
تؤکولسون دیده‌لری.

من عاشیقم آجاری،
یویولمامیش آجاری.
هر کیم یارا پیس دئسه،
دیلین وورسون آج آری.

قارا آتین قولاغی،
گؤزلری شاه بولاغی.
ائشیتدیم یار ائولنیب،
قارا گلسین دوواغی.

قؽزیل اینه‌نین ساپی،
گؤرونور بیزیم قاپی.
یاری یاردان ائیله‌ین
دیلنسین قاپ-قاپی.

یاز گئدیب، قؽش اولایدی،
قاش گؤزه توش اولایدی.
دۆشمن دیلی توتولسون،
دوست دئین ایش اولایدی.

گئتمه، قال یان، قور آخ-وای،
رقیب اؤلسون، ووراق وای.
عزرائیل جانیم آلسین،
یاردان اولسام قؽراق، وای.

دریادا گمیم قالدی،
بیچمه‌دیم زمیم قالدی.
آرزون اۆرکده قالسین،
نئجه کی منیم قالدی.

من عاشیق دیلیم هارای!
یئمه‌یه دیلیم هارای!
نه دئدیم یارا دگدی؟
قوروسون دیلیم هارای!

باغدا مئیوه دگسین، قوی،
دگیب بوینون ایسین، قوی.
جانیمین جانی چؽخسین،
جزاسیدی، چکسین قوی.

گۆلون در اک اوجونان،
قلیانین تک اوجونان.
نامرده قوش اولوبسان،
بلالار چک اوجونان.

آمان فلک، داد فلک،
هئچ اولمادیم شاد فلک.
ایچیردیگین شربتدن
اؤزون ده بیر داد، فلک.

درد گلر گۆله ساردان،
کؤچ گئدر گۆلزاردان.
خارین اؤلسون، آی بۆلبول،
قورتارسین گۆل آزاردان.