بایاتی

داغ باشیندا آغ قارام،
باغچالاردا من بارام.
گۆنوم آه-وایلا کئچسه،
تکجه سنه قارغارام.

ایلقارین اولدو یالان،
کؤنلومو ائتمه تالان.
آیریلسین، آیری دۆشسون
بیزه آیریلیق سالان!

من هاماییل دئییلم،
آغلی زاییل دئییلم.
قوی اؤلسون اؤلمه‌لیلر،
سنه قاییل دئییلم.

ائله‌می پرده سالان،
اۆزونه پرده سالان.
گؤروم بیر ده گۆلمه‌سین
منی بو درده سالان.

قاینار قازانیم منیم،
اوینار اوزانیم منیم.
دۆشسون قلمین الدن،
یازی یازانیم منیم.

داغلار، نئجه داغلارسان؟
قاردان کمر باغلارسان.
قوی اؤلسون ایگید دوستون،
باخ گؤر نئجه آغلارسان.

گۆنئیدن گۆنه دۆشدوم،
باغلی دۆگونه دۆشدوم.
فلک، ائوین یؽخیلسین،
سن دئین گۆنه دۆشدوم.

میخک اکدیم دسینن،
ساخلادیم هوسینن.
منی سندن ائدنین
گۆنو کئچسین یاسینان.

داغلارین لالاسیندان،
ائل یاتماز نالاسیندان.
بیزه آیریلیق سالان
گؤرسون اؤز بالاسیندان.

عزیزی‌یم، یاسا من،
دارا زۆلفون، یاسمن.
ایستکلی ارین اؤلسون،
گلیم سیزه یاسا من.

قاشلارین قاراسیندان،
اؤپیدیم آراسیندان.
منی یاردان آییران
آیریلسین بالاسیندان.

صالح، مین دئ، یا سمن،
سۆسن، سۆنبول، یاسمن.
قوی اؤلن رقیب اولسون،
گۆنده گئدیم یاسا من.

پنجره‌سن، شیشه‌سن،
سیوریله‌سن، دۆشه‌سن.
سئوگیلی یارین اؤلسون،
الدن-اله دۆشه‌سن.

اووچولار اوو توتماسین،
اوولاسین، اوو توتماسین.
سنی ووران اووچونون
قوللاری سوو توتماسین.

پنجره‌ده شۆشه‌سن،
سۆروشه‌سن، دۆشه‌سن.
یاری مندن ائیله‌ین،
یامان درده دۆشه‌سن.

آغ آلمان آغلی قالسین،
دسمالدا باغلی قالسین.
ایستکلی یارین اؤلسون،
اۆرگین داغلی قالسین.

بو یوللار ایشله‌مه‌سین،
بزیرگان قؽشلاماسین.
من سئودیم، سن آپاردین،
تانری باغیشلاماسین.

آغ چوخان آغلی قالسین،
بوغچادا باغلی قالسین.
مننن اۆز دؤندرن یار،
اۆزون دوواقلی قالسین.

ساچلارین دارا گلسین،
قلبینده یارا گلسین.
منی ‫مأيوس ائدنین
آغ گۆنو قارا گلسین!

من عاشیق او دا قانسین،
دئدیم دردیم اینانسین.
منی یاردان ائیله‌ین،
اود توتوب اودا یانسین.