بایاتی

یار دؤنسون یارا، گلسین،
دردیمه چارا گلسین.
منی پیس گۆنه قویان،
بایرامین قارا گلسین!

پروانه اودا یانسین،
من گئدیم، او دایانسین.
او کی منی یاندیردی،
اود توتسون، او دا یانسین.

عزیزیم هارا گلسین؟
زۆلفونو دارا، گلسین!
سنسیز بایرام ائیله‌سم،
بایرامیم قارا گلسین!

پروانه اودا یانسین،
اود توتسون، اودا یانسین.
من یاندیم یار اوجوندان،
ائشیتسین، او دا یانسین.

بوز آتین بویلاماسین،
چک باشین، اویناماسین.
گئدیرسن گئجه‌دن گئت،
اۆرگیم اویناماسین.

عزیزیم او دایانسین،
آلیشسین اودا یانسین.
فلک بیر درد گؤندریب،
من یاندیم، او دا یانسین.

الین حنا توتماسین،
باتسین قانا، توتماسین.
منسیز ائو تیکن یئرده
ائوین بینا توتماسین.

بو داغلار اودا یانسین،
اود توتوب، اودا یانسین.
یارا خبر یئتیرین،
من یاندیم، او دا یانسین.

کؤینگین میلی یانسین،
اود آلسین، گۆلو یانسین.
سنی مندن ائدنین
آغزیندا دیلی یانسین.

فلکین چارخی دؤنسون،
سو گلسین چارخی دؤنسون.
باشدان سویو بولانسین،
آیاقدا چارخی دؤنسون.

من عاشیق تار چالینسین،
اوخونسون، تار چالینسین.
منی سندن ائدنین
بالاسی پارچالانسین.

بۆلبولسوز باغدا نه وار؟
بو قمگین چاغدا نه وار؟
کۆل باشینا، آ مجنون،
لئیلیسیز داغدا نه وار؟

ککلیگیم داشا دولسون،
ال وورما، یاشا دولسون.
منی سندن آییران
نه گۆلسون، نه شاد اولسون.

قؽرمیزیدیر کۆرکون، یار،
چؽخ کۆچه‌یه، گؤر کیم وار؟
عهدینه دۆز چؽخمادین،
یئره گیرسین بؤرکون، یار.

گئتدیگین مشد اولسون،
یوللاری گۆشاد اولسون.
سنی مندن آییران
نه گۆلسون، نه شاد اولسون.

دولان گل بئله، باغلار،
کمندین بئله باغلار.
بۆلبول اؤتمز، گۆل بیتمز،
چؤل اولسون بئله باغلار.

آغ آت، یالین قوروسون،
خطّو خالین قوروسون.
آپاردین، گتیرمه‌دین،
گؤروم نالین قوروسون.

کۆر قؽراغی دردوولار،
دردلی گزر، درد اوولار.
نامردی شاهمار چالسین،
کئچسین جانا زردوولار.

داغلاری گزن اؤلسون،
داشلارین دۆزن اؤلسون.
من سندن ال اۆزمه‌دیم،
الیمی اۆزه‌ن اؤلسون.

بو داغلار آزا داغلار،
قول اولان آزاد آغلار.
سنین ده منیم کیمی
مارالین آزا، داغلار.