بایاتی

آشیق آی، گۆنو بوردا،
دولان، سای گۆنو بوردا.
قبرینه چپر اوللام،
قاللام یای گۆنو بوردا.

من عاشیق اوخوسانا،
درس آلیب اوخوسانا.
سن بیر گؤزل مارالدین،
کیم ووردو اوخو سانا.

عزیزیم گؤز آلمایا،
دؤنوبدو گؤز آلمایا.
عرصه‌میش نر اؤلدوردون،
قانلیسان، گؤزل مایا.

ائله‌می قاراسینا،
قاشلارین قاراسینا.
دور، آنان قوربان اولسون
اۆرگین یاراسینا.

آنا، منی آز آغلا!
قؽشی دایان، یاز آغلا!
منیم بو دردلریمی
بیر خزه‌له یاز، آغلا.

چؽخدیم داغلار باشینا،
یازی یازدیم داشینا.
گلن-گئدن اوخوسون،
نه‌لر گلدی باشیما.

عزیزیم یامان بلا،
آغیردیر یامان بلا.
روادیر یاخشی اؤله،
یئرینده یامان قالا؟!

بیر آتیم وار زیل قارا،
گؤندر گئتسین ایلقارا.
عؤمرون جاوان چاغیندا
عجب گئیدیم زیل قارا.

یاییلدی گۆن باغلارا،
شئه دۆشدو یارپاقلارا.
حئیف سنین بو جانین
قاریشدی تورپاقلارا.

آشیق گلیر های ایله،
بولود گزیر آی ایله.
باش قویوم دیزین اۆسته،
جان وئریم آه-وای ایله.

ایرفه دۆزدوم کاسا،
الیمه آلدیم هاسا.
اؤلدون، دۆشمن سئویندی،
یؽغیلدی، گلدی یاسا.

داغلارین لالاسی‌یله،
الده پیاله‌سی‌یله.
بوردا بیر گلین اؤلوب،
یانی‌نین بالاسی‌یله.

بالام وای گونو دۆزده،
نالام آی، گۆنو دۆزده.
قبرینه چپر اولوب،
قالام یای گۆنو دۆزده.

ائله‌می تیکان گۆله،
سارماشیب تیکان گۆله.
فلک ده گؤز تیکیبمیش،
من گؤزوم تیکن گۆله.

عزیزیم خلی یئرده،
گۆل، بنؤوشه‌لی یئرده.
یار کیمسه‌سیز جان وئردی،
قالدی دؤشه‌لی یئرده.

فلکین قهری منه،
هئچ گلمز رحمی منه.
عالمه شربت وئردی،
ایچیرتدی زهری منه.

خوروز بان وئرن یئرده،
یارام قان وئرن یئرده.
آنا گلسین یئتیشسین،
اوغول جان وئرن یئرده.

آرازین گمی‌سینه،
سو سالیم زمی‌سینه.
هئچ ایگیدین بالاسی
قالماسین عمی‌سینه.

عزیزیم تیکه-تیکه،
دوغراندیم تیکه-تیکه.
آنان ساچینی یولور
کفه‌نین تیکه-تیکه.

یۆکو یؽغدیم دۆزونه،
پرده چکدیم اۆزونه.
تانری منه پای وئردی،
گئنه وئردیم اؤزونه.