بایاتی

مه‌له جئیرانیم، مه‌له،
بالانی وئرمه اله.
من مه‌له‌دیم، گلمه‌دی،
سن مه‌له، بلکه گله.

عزیزی‌یم سیس گۆنه،
پرده توتوب سیس گۆنه.
اؤزون اؤلدون، قورتاردین،
منی قویدون پیس گۆنه!

بولاغین باشی ایله،
دیبی‌نین داشی ایله.
سنه بیر توی توتارام
گؤزومون یاشی ایله.

لا-لای دئ، دولان، اؤلمز،
هر رنگی سولان اؤلمز.
سونسوزلوق یامان شئیدی،
بالاسی اولان بیلمز.

آشیق گۆلمنم سنسیز،
دئییب-گۆلمنم سنسیز.
داغ باشیندا اوو مه‌لر،
ائله بیل منم سنسیز.

بنؤوشه چیچکلندی،
یارپاغی لچکلندی.
یاتدیغی یالان اولدو،
اؤلومو گئرچکلندی.

عزیزی‌یم ساری قؽز،
ساری کؤینک، ساری قؽز.
آچ بئلی‌نین قورشاغین،
جنازه‌می ساری، قؽز.

دان اولدوزو دیکلندی،
کاروان یولا یۆکلندی.
سینه‌م بادامجا کؤزو،
ائل ووردو کؤروکلندی.

باغا گیردیم باغبانسیز،
دوه گؤردوم ساروانسیز.
عالمه درمان دئدیم،
بالام اؤلدو درمانسیز.

من عاشیق حالیق وئردی،
های وئردی، حالیق وئردی.
من سنی گیزله‌میشدیم،
عزرائیل سالیق وئردی.

من عاشیقم یانار سوز،
یا هئیواسوز، یا نارسوز.
آهیم داغلارا دۆشدو،
قاچین ائللر، یانارسوز.

من عاشیق چکیم دردی،
دوغرویوم، تؤکوم دردی.
نه آنام وار، نه باجیم،
کیمیننن چکیم دردی؟

منه فلک ائیله‌دی،
اوخوم للک ائیله‌دی.
گیردی گۆللو باغیما،
الک-ولک ائیله‌دی.

عزیزیم گشته گئتدی،
خنجر گۆموشده گئتدی.
آرخام، اۆمیدیم واردی،
او دا دؤیوشده گئتدی.

قوشلار قاناد اۆسته‌دی،
آتما، قاناد اۆسته‌دی.
الین قوروسون، فلک،
اوغلوم موراد اۆسته‌دی.

عزیزی‌یم جان گئتدی،
یارالاندیم، قان گئتدی.
قؽز بوینون بۆکوب آغلار،
ناموراد اوغلان گئتدی.

عاشیق ائللر یئریدی،
شانا تئللر یئریدی.
قایساقلانمیش یاراما
تزه میللر یئریدی.

عزیزی‌یم بار گئتدی،
باغبان گئتدی، بار گئتدی.
اعتیبارسیز دۆنیادان
اعتیبارلی یار گئتدی.

بو باغلار اولماسئیدی،
سارالیب سولماسئیدی.
منه یاس نه یاراشیر،
یار غفیل اؤلمسئیدی.

باهار گلدی، قار گئتدی،
باغبان گئتدی، بار گئتدی.
منی پیس گۆنه قویدو،
ناکام اؤلدو، یار گئتدی.