بایاتی

آی ندن گۆلدو، گئتدی؟
گئجه‌نی بؤلدو، گئتدی.
دۆشمن آمان وئرمه‌دی،
جاوانلار اؤلدو، گئتدی.

یولا تؤکمه تیکه‌نی،
یول گؤتورمز تیکه‌نی.
یؽخما آنان ائوینی،
یوخدور داها تیکه‌نی.

عزیزیم فنر کئچدی،
بو داغدا فنر کئچدی.
عزرائیل سینه‌ن اۆسته،
قلبیندن نه‌لر کئچدی؟

گزدیردی چایدا منی،
یوردو بو قایدا منی.
اؤلدون، جانین قورتاردی،
قویدون آه-وایدا منی.

النیبدیر الیی،
چیرمنیب آغ بیله‌یی.
خبر اولسون دۆشمنه،
حاصیل اولوب دیله‌یی.

آپار بازارا منی،
وئرمه نظره منی.
آچ بئلیندن شالینی،
دۆشور مزارا منی.

عزیزی‌یم اوو دیلی،
اوو دانیشار اوو دیلی.
یاریمی اوولاییبلار،
اؤیرنمیشم اوو دیلی.

وئردی نظره منی،
سالدی آزارا منی.
آچ بئلیندن قورشاغی،
ساللا مزارا منی.

عزیزیم هئی دردیمی،
بو گلن حئیدردیمی؟
کاش آنام ساغ اولایدی،
چکه‌یدی هئی دردیمی.

باغیندا یاسه‌مه‌نی،
لاله‌نی، یاسه‌مه‌نی.
ایستردیم یاسدان چؽخام،
یار سالدی یاسا منی.

عزیزیم سال یئریمی،
کۆر آخدی، سال یئریمی؟
خسته‌نه بیر رحم ائیله،
اؤلورم، سال یئریمی.

عزیزیم، یاسه‌مه‌نی،
یار گزر یاسه‌مه‌نی.
اؤلمه‌یین یقین اولدو،
باتیردین یاسه منی.

عرب قاپدی فسیمی،
سو کسدی نفسیمی.
گئدین دئیین آناما،
توتسون منیم یاسیمی.

درد-غمله اویدون منی،
تالادین، سویدون منی.
سن اؤلدون، بورجدان چؽخدین،
پیس گۆنه قویدون منی.

بیر ائو تیکدیم دگیرمی،
پنجره‌سی ایگیرمی.
اؤلوب هارا گئدیرسن،
بو یورد سنین دئییلمی؟

گلمیشم گؤروم سنی،
یؽخمیشام، هؤروم سنی،
نه قاپین وار، نه باجان،
بس هاردان گؤروم سنی؟

من عاشیق دۆزلر سنی،
چاغیریر قؽزلار سنی.
آلدی باغرینا باسدی
یووشانلی دۆزلر سنی.

بو داغلار تالا داغی،
بۆرویوب لالا داغی.
هر داغ اولسا چکیلر،
چکیلمز بالا داغی.

من عاشیق قالا یئری،
بۆرج یئری، قالا یئری.
یۆز جانی یانان اولسا،
وئرمز بیر آنا یئری.

عزیزیم وورما داغی،
له‌له‌یه وورما داغی.
آغلاما، باجی زئینب،
سینه‌مه وورما داغی.