بایاتی

سؤزوم سؤزونده قالدی،
گؤزوم گؤزونده قالدی.
اجل آمان وئرمه‌دی،
آرزوم گؤزومده قالدی.

داغ اۆستونو قار آلدی،
گونوم درددن قارالدی.
کیلیدلنمه‌ین قاپیم
کیلیدسیز باغلی قالدی.

عزیزیم بینه قالدی،
ائل کؤچدو، بینه قالدی.
وفالی یاری گؤرمک
قیامت گۆنه قالدی.

نه بوداقدی، نه دالدی،
نه غوغادی، نه قالدی.
اؤلدون، جانین قورتاردی،
من یازیغا نه قالدی؟

بوستان اکیلی قالدی،
نه تاغ، نه گۆلو قالدی.
بئله هارا گئدیرسن،
یئتیم تؤکولو قالدی.

داغلاردا نه جالالدی،
اووچولار ماجال آلدی.
بیر گؤزوم یار یولوندا،
بیر گؤزوم اجل آلدی.

عزیزیم داغلی قالدی،
یار قلبی داغلی قالدی.
زنجیر، بوخوو گؤرمه‌دی،
قوللاریم باغلی قالدی.

درده منی بو سالدی،
اوزون عؤمروم قؽسالدی.
قان آغلایان گؤزلریم
ویران باغا سو سالدی.

گؤروکن قاراغاندی،
من دئدیم یارا، قاندی.
ایگیدیم اوخلانیبدی،
اۆرکلر قارا قاندی.

قؽزیلگول آخچالاندی،
گۆلو تاباخچالاندی.
جان وئرنده گلمه‌دین،
قبریم ده مؽخچالاندی.

عزیزی‌یم یۆز قاندی،
اللی قاندی، یۆز قاندی.
قؽز، نیشانلین اؤلوبدو،
زۆلف پریشان، اۆز قاندی.

گؤیدن بیر اولدوز آخدی،
آخدی گئتدی، قوناخدی.
آنا بالا اوجوندان
جانینی اودا یاخدی.

سمندین اویناغاندی،
سۆر گئتسین، اویناغاندی.
سنی ووران اووچونون
اللری، اوی، نه قاندی.

آت منی آلدی قاشدی،
سۆموکلریم چالخاشدی.
آناما خبر وئرین،
منزیلیم اوزاخلاشدی.

گؤروکن قاراغاندی،
ازگیلدی، قاراغاندی.
مارالی اوخلویوبلار،
تؤکولن قارا قاندی.

باغیمدا وار گاوالی،
باشیم اولوب هاوالی.
عزرائیل اووا چؽخدی،
منه ووردو زاوالی.

عزیزیم، آغدا یاندی،
شاماما تاغدا یاندی.
اؤزومو داغا وئردیم،
آلیشدی، داغ دا یاندی.

باغبان بسلر گۆل آلی،
یارپاق یاشیل، گول آلی.
فلکین قایداسیدی،
آچیلمامیش گۆل آلی.

شالیم قارا بویاندی،
اوجو یئره دایاندی.
من سنی آغلایاندا
ائل سسیمه اویاندی.

قامیش تاپدیم یازیلی،
دؤرد بیر یانی قاضیلی.
چؽخدیم اجل کؤشکونه،
گؤردوم قبریم قاضیلی.