بایاتی

آی دوغدو، لاختالاندی،
دوغدوقجا لاختالاندی.
یاریما خبر وئرین،
مزاریم تاختالاندی.

مارالین گؤزو قانلی،
توپوغو دیزی قانلی.
بالامی منه وئرین،
توتارام سیزی قانلی.

قؽزیلگول آخچالاندی،
درمه‌دیم آخچالاندی.
سنه کیملر قارغیدی،
پالتارین بوخچالاندی.

باغچانین وار بادامی،
دادلیدیر یار بادامی.
ایگیده ائل آغلاسین،
دئسینلر وار آدامی.

ایسته‌مز یاد آدامی،
اریدر داد آدامی.
بالا یاندیران کیمی
یاندیرماز اود آدامی.

آغاجدا پۆسته ساری،
دولان گل دوستا ساری.
ساچلارین کفن ائیله،
جنازم اۆسته ساری.

بو یئرده باغ اولارمی؟
سالخیمی آغ اولارمی؟
بئله دردی اولانین
آناسی ساغ اولارمی؟

آشیق ائللر آیری‌سی،
شانا تئللر آیری‌سی.
بیر گۆنونه دؤزمه‌دیم،
اولدوم ایللر آیری‌سی.

عزیزی‌یم آخارمی؟
سولار داغدان آخارمی؟
کور اولدو خان گؤزلریم،
سنسیز بیر ده باخارمی؟

اززیم اۆزوم آغاجی،
اۆزوم، دۆزوم آغاجی.
باغا بالتالی گیردی،
کسدی بیزیم آغاجی.

آت آلدین، آل یورغانی،
یوللارا سال یورغانی.
گلن اجل تریدی،
اۆستومدن آل یورغانی.

قارداش دئدی قارداشی،
قارلی داغدان قار داشی.
باجی نه یامان آغلار،
یوخسا اؤلوب قارداشی؟

بۆلبول هانی، گۆل هانی؟
بۆلبول گۆلون مئهمانی.
گلدیم سنی گؤرمه‌یه،
بس آغزیندا دیل هانی؟

عزیزی‌یم گۆل ای وای،
بۆلبول ای وای، گۆل ای وای.
بیر باغا باغبان اولدوم،
هئچ درمه‌دیم گۆل، ای وای.

باغیندا گۆلون هانی؟
اۆسته بۆلبولون هانی؟
یاش تؤکوب آغلاییرسان،
سؤز قوشان دیلین هانی؟

من اززی‌یم گۆل ای وای،
بۆلبولوم وای، گۆلوم وای.
باغینا باغبان اولدوم،
هئچ درمه‌دیم گۆلوم، وای!

بۆلبول گۆل باراباری،
جئیران چؤل باراباری.
بوردا بیر اوغلان اؤلوب،
بۆتون ائل باراباری.

جانیمی آلدی فلک،
من گئتدیم، قالدی فلک.
باغدا بیر بار یئتیردیم،
اونو دا سالدی فلک.

آشیغین اؤز مزاری،
شان بالدان اۆزمز آری.
گر ایتیرسن قبریمی،
گزرسن یۆز مزاری.

بو دردی قانام گرک،
اودلارا یانام گرک.
یاد آغلار، اۆزدن آغلار،
آغلاسین آنام گرک.