بایاتی

من عاشیق گئجه‌لرم،
گۆندوزو گئجه‌لرم.
سن اؤلدون، ناکام گئتدین،
من سنسیز نئجئلرم.

یاتمیش ایدیم، اویاندیم،
درده، غمه بویاندیم.
داش اولسام ارییردیم،
تورپاق ایدیم دایاندیم.

ائله‌دیمی وای دردیم،
وای درمانیم، وای دردیم.
خالق گۆل اکدی، گۆل دردی،
من گۆل اکدیم، وای دردیم.

دورما گل، تالان جانیم،
اودلارا یانان جانیم.
بالا دئییب یاش تؤکور
بالاسیز قالان جانیم.

آزالماز منیم دردیم،
ساز اولماز منیم دردیم.
مئشه‌لر قلم اولسا،
یازیلماز منیم دردیم.

عزیزیم قارا باختیم،
آچیلماز قارا باختیم.
اؤلوبدو اکبر اوغلوم،
یاتیبدی قارا باختیم.

کئچمه‌ییر سؤزوم، نئیلیم؟
بو درده دؤزوم، نئیلیم؟
آه چکسم عالم یانار،
چکمه‌سم اؤزوم نئیلیم؟

من عاشیق سازلی گؤردوم،
حؤکموم یازیلی گؤردوم.
اجل گلدی، من قاچدیم،
قبریم قاضیلی گؤردوم.

چینیمده چوخا منیم،
شال منیم، چوخا منیم.
سنی اؤلموش گؤرونجه
گؤزلریم چؽخا منیم.

عزیزیم بیچین گؤردوم،
یول اؤتدوم، بیچین گؤردوم.
من سندن آیریلمازدیم،
فلکین گۆجون گؤردوم.

داغلار داغیمدی منیم،
غم اوولاغیمدی منیم.
دیندیرمه، قان آغلارام،
یامان چاغیمدی منیم.

چؽخدیم، یازیلار گؤردوم،
نه تامارزیلار گؤردوم.
آناسیننان آیریلمیش
کؤرپه قوزولار گؤردوم.

سنه یارالی قوربان،
باغری قارالی قوربان.
سنین تزه یارانا
کؤهنه یارالی قوربان.

من عاشیق باغلاماقنان،
قان دورماز باغلاماقنان.
اوغول داغی آغیردی،
ساغالماز آغلاماقنان.

کابابا کؤزو قوربان،
کسیرلر قوزو قوربان.
اؤزگه‌دن قوربان اولماز،
اؤز دده‌ن قؽزی قوربان.

یارالاندیم یانیمنان،
قوشلار دویماز قانیمنان.
بیر بلایا دۆشدوم کی،
بئزار اولدوم جانیمنان.

عزیزی‌یم داغداغان،
داغدا بیتر داغداغان.
اووچو ووروب بالاسین،
گؤل-گؤل اولوب داغدا قان.

داغلار، نئجه داغلارسان؟
قاردان کمر باغلارسان.
قوی اؤلسون عزیز بالان،
باخ گؤر نئجه آغلارسان.

من اؤلدوم آغلاماقدان،
قلبیمی داغلاماقدان.
باغدا یارپاق قالمادی،
یاراما باغلاماقدان.

کرگه‌دنم، کرگه‌دن،
یوخدور منی اؤیردن.
اووچو بیر اوو اوولادی،
او دا بیزیم جرگه‌دن.