بایاتی

آراز آخار لیلینن،
بۆلبول اوینار گۆلونن.
سنی نئجه آغلاییم،
بو قوروموش دیلینن.

باغا بار آلان گلسین،
هئیوا-نار آلان گلسین.
چؽخسینلار، چاغیرسینلار،
میراس مال آلان گلسین.

بولاغین باشینا سن،
دیبی‌نین داشینا سن.
دۆگون قویدون، داغ چکدین
اۆرگیم باشینا سن.

قویونو قویون گلسین،
دری‌سین سویون، گلسین.
آی یؽغیلان جاماعات،
بالامی قویون گلسین.

ائله‌دیمی یار گئتسین،
طبیب، یارام یار گئتسین.
اجل گلسه، جان گئتسه،
یار اۆستونه یار گئتسین.

عزیزیم های منیمچون،
دریالار چای منیمچون.
من اؤلسم، سنه قوربان،
سن اؤلدون، وای منیمچون.

آناما دئیین، آغلاسین،
باشینا قارا باغلاسین.
گلدیم اجل قویمادی،
نیشانه‌می ساخلاسین.

عزیزی‌یم، یارا وار،
یارام اۆسته یارا وار.
پارالانمیش سینه‌مده
ال دگمه‌میش هارا وار؟

منی گؤرن آغلاسین،
تورون هؤرن آغلاسین،
ازل گؤرن پیس گؤروب،
ایندی گؤرن آغلاسین.

داغلارین سیری ده وار،
اؤلن وار، دیری ده وار.
دئمه دردلی بیر منم،
سنینتک بیری ده وار.

اوو گلسین، اوو آلماسین،
چاخماغی قوو آلماسین.
سنی ووران اووچونون
ترلانی اوو آلماسین.

آی کئچیر، ایله نه وار،
جان یانیر، دیله نه وار.
چوخ دا بۆلبول یاس توتوب،
بو یاسدان گۆله نه وار؟

سن منی آغلار قویدون،
سینه‌مه داغلار قویدون.
یؽخدین آتام ائوینی،
قاپی‌سین باغلار قویدون.

باغچادا مرزیمیز وار،
گلمیشیک، عرضیمیز وار.
بیزه ده ماجال وئرین،
اۆرکده دردیمیز وار.

سیننینی گۆنه قویون،
کؤلگه‌دن گۆنه قویون.
ائوین ییه‌سی اؤلوب،
گلین بیر بینه قویون.

داغیستانین داغی وار،
چؽخما یولا، یاغی وار.
دیندیرمه، قان آغلارام،
منده قارداش داغی وار.

سنین او آلا بؤرکون،
باشیما بلا بؤرکون.
سانا کیم قارغامیشدی،
بوش قالا بئله بؤرکون.

گؤی اۆزونده بیر آی وار،
بیر اولدوز وار، بیر آی وار.
بو گۆنلره قالدیغیم،
اوزاق دئییل بیر آی وار.

غریب اؤلدو، گؤتورون،
دار کۆچه‌دن اؤتورون.
غریبین وای خبرین
آناسینا یئتیرین.

اینیمده زرخارام وار،
اۆرگیمده یارام وار.
آچ باغریمین باشینی،
گؤر یانمامیش حارام وار؟