بایاتی

یارالاندیم یانیمدان،
قوشلار دویماز قانیمدان.
سن نووجاوان اؤلنده
من ده کئچدیم جانیمدان.

سو گؤتوردوم هؤووزدن،
سویو چؽخیبدی دیزدن.
فلک بیرجه بالانی
زورلا آییردی بیزدن.

باغلارین دیواریندان،
شاختا گلیر قاریندان.
تزه مئیوه یئتیردیم،
یئمه‌دیم نۆباریندان.

من اؤلورم چیچکدن،
اۆزوم اؤرتون میلچکدن.
یاد گلر، آغی سؤیلر،
آنام آغلار گئرچکدن.

قاشلارین قاراسیندان،
قوی اؤپوم آراسیندان.
گئج تاپیب، تئز آیریلدیم
یاریمین بالاسیندان.

من عاشیق ایتی بئلدن،
یئر قورخار ایتی بئلدن.
قوی منی یار آغلاسین،
دئسینلر ایتیب ائلدن.

منی ووردو بوز ایلان،
گؤزوم دولدو توز ایلن.
منیم کیمی وارمی هئچ
بوستانی گؤی پوزولان.

باغا گیردیم ازلدن،
دسته توتدوم خزلدن.
گۆلومو ایله‌مه‌میش،
فلک آلدی تئز الدن.

من عاشیق مینا گردن،
مینا بوی، مینا گردن.
تورپاق آلتدان سال قویون،
قورخورام سؽنا گردن.

گؤی اۆزونده پرده‌سن،
غفیل دۆشدون درده سن.
سن کی بیر اود-آلوودون،
نئجه یاتدین یئرده سن؟

بیر قوش گلیر کرگردن،
کتان کؤینک، آغ گردن.
اؤزون اؤلدون، قورتاردین،
منی قویدون سرگردن.

سن منی دیندیرمیسن،
غم آتین میندیرمیسن.
یؽخیب آتام ائوینی،
بئلیمی سؽندیرمیسان.

کۆر اۆستونده کسمن،
باش ساللاییب یاسمن.
نه آنام وار، نه باجیم،
سسیم قاتام سسه من.

یار گؤروندو داغ اۆستن،
یول کئچیردی باغ اۆستن.
فلکین قایداسیدی،
چکر داغی داغ اۆستن.

فلکه درد وئردیم من،
نه درد وئردی یئدیم من.
آلدی الدن یاریمی،
کیمه عرضه گئدیم من؟

یول گئدیردیم، اولدو تن،
کیم وار بو یولدان اؤتن.
گؤره‌سن بو دۆنیادا
وارمی مورادا یئتن؟

باغچالاری اکن من،
بارین دریب تؤکن من.
بالامی اؤلدوردولر،
نه بدبختم، تکم من.

سونام، سسه‌می گلدین؟
دابانباسامی گلدین؟
ساغلیغیمدا گلمه‌دین،
اؤلدوم، یاسامی گلدین؟

من عاشیق، یاسمننن،
کؤینگی یاسمننن.
قونشودا بیر مرد اؤلوب،
گل گئدک یاسه مننن.

زۆلفونو دارا گلسین،
دوست-آشنا هارا گلسین؟
سنسیز خوش گۆن کئچیرسم،
خوش گۆنوم قارا گلسین.