بایاتی

قازان داشدی، کفین آل،
قاینادیقجا کفین آل.
باغچادا بۆلبول اؤلوب،
گئت گۆللردن کفن آل.

عزیزی‌یم اۆسته گل،
قوی قبریمین اۆسته گل.
آچ باشیندان شالینی،
جنازمین اۆسته سال.

باغچادا گۆل، باغدا گۆل،
باغدا دانیش، باغدا گۆل.
اؤلدوردولر بۆلبولو،
آل قان اولدو باغدا گۆل.

من عاشیق گۆلدن آللام،
گۆلو بۆلبولدن آللام.
باغدا بیر بۆلبول اؤلوب،
حاییفین گۆلدن آللام.

داغ دؤشونده ساری گۆل،
یاری قؤنچه، یاری گۆل.
تئز آچیلدین، تئز سولدون،
آچمایایدین باری، گۆل.

دردین چوخدور، دؤز، آنام،
اۆرگی کؤز-کؤز آنام.
قوهوم-قارداش دایانسین،
قوی آغلاسین اؤز آنام.

من عاشیقم اویان، گۆل،
بو یان باغچا، او یان گۆل.
رنگین ندن سارالدی،
منی مغمون قویما گۆل.

یاسلی‌یام، باش باغلارام،
یویارام، یاش باغلارام.
تا-توشونو گؤرنده
باغریما داش باغلارام.

قانادسیز بیر قوشام، من،
داغلارا قونموشام، من.
خسته‌یدیم خبرسیزدین،
ایندی کی اؤلموشم من.

گئتدی گۆلوم، آغلارام،
اولدو ظۆلوم، آغلارام.
اسدی وعده کۆله‌یی،
تؤکدو گۆلوم، آغلارام.

داغین سویون ایچدیم، گل،
داغدا یاندیم، بیشدیم، گل.
عزرائیل اووا چؽخدی،
ایلک اووونا دۆشدوم، گل.

خسته‌یم، یان اۆسته‌یم،
یارام وار، قان اۆسته‌یم.
گل بیر قول-بویون اولاق،
اؤلورم، جان اۆسته‌یم.

آمان-آمان اولدو، گل،
حالیم یامان اولدو، گل.
بیر ده سنی گؤرمه‌ییم،
آخیر زامان اولدو، گل.

داغلارین قاری منم،
گۆن یوخدور، اریمنم.
قبریمی دایاز قاضین،
جاوانام، چۆرومنم.

قارداش گل، آی قارداش گل،
قارلی داغلاری آش، گل.
باجین درده دؤزمه‌دی،
سن ده گؤزونده یاش گل.

آرازین باشی منم،
تورپاغی، داشی منم.
غریبه آغلایانین
گؤزونون یاشی منم.

عؤمور منم، باخت منم،
دردلی دئسن، باخ، منم.
سندن سونرا دۆنیایا
بیر ده دؤنوب باخمانام.

قاپیدا دورما، یئتیم،
بوینونو بورما، یئتیم.
کیرپی‌یینی اوخ ائدیب،
جانیما وورما، یئتیم.

دردی داشا دئیرم،
جوشا-جوشا دئیرم.
ایکی عزیزیم اؤلوب،
قوشا-قوشا دئیرم.

قاپی‌نین یانی یئتیم،
سؤزومون جانی یئتیم.
قارین دویاننان سونرا
دئیرلر هانی یئتیم.