بایاتی

بو داغلار، قوشا داغلار،
چاتیب باش-باشا داغلار.
سیزده اوغول ایتیردیم،
دؤنه‌سیز داشا، داغلار!

عزیزی‌یم تور داغلار،
سنه یاغسین نور داغلار.
گلمیشدیم خسته گؤرم،
خسته کؤچوب، یورد آغلار.

عزیزیم مزه داغلار،
گۆللری بزه، داغلار.
کؤهنه یارام اۆستوندن
چکیلدی تزه داغلار.

بو داغلار اولو داغلار،
چئشمه‌لی، سولو داغلار.
بوردا بیر غریب اؤلوب،
گؤی کیشنر، بولود آغلار.

تنها قالاسیز، داغلار،
گۆلسوز، لالاسیز داغلار.
سیزده گزن کؤچوبدو،
سیز هله وارسیز، داغلار.

دؤرد یانی بؤلدو، داغلار،
اۆستونوز گؤلدو، داغلار.
سیزه اۆمید باغلایان
بیر اوغلوم اؤلدو، داغلار.

باغچاسیز، بارسیز داغلار،
هئیواسیز، نارسیز داغلار.
سیزده گزن گؤچوبدور،
سیز هله وارسیز، داغلار؟

دریادا ماهنی آغلار،
الده سۆراهی آغلار.
منیم ظۆلمومو گؤرسه،
درد چکر، آهو آغلار.

بو داغلار قانلی داغلار،
گؤی گئییب قانلی داغلار.
ایگیدین پیس گۆنونه،
گلیب قانلی دا آغلار.

بوردا بیر ناشی آغلار،
سینه‌مین باشی آغلار.
ائلده بیر غریب اؤلوب،
اوجاغی، داشی آغلار.

بو داغلار، یالین داغلار،
درد-غمه دالین، داغلار.
سیزده مرد باسدیرمیشام،
کئشیکده قالین، داغلار.

بوردا بیر گؤیچک آغلار،
گلر آغبیرچک آغلار.
یاد آغلار، یالان آغلار،
اؤز آنام گئرچک آغلار.

عزیزیم نازیک آغلار،
گئیمه‌یه نازیک آغلار.
قوی منه یار آغلاسین،
یار آغlar.nazik آغلار.

دیلیمده سؤزوم آغلار،
یاش تؤکر گؤزوم آغلار.
آیریلیق چتین شئیدیر،
من نئجه دؤزوم، آغلار؟

توفان قوپار، ائل آغلار،
چایلار داشار، سئل آغلار.
غریبلیکده اؤلنین
یاسین توتار، ائل آغلار.

عزیزی‌یم قان آغلار،
قان قارالار، قان آغلار.
من اؤلوم، یار بیلمه‌سین،
گئجه-گۆندوز قان آغلار.

من عاشیق، گؤزل آغلار،
گؤزلرین گؤزل آغلار.
خبر گئتسه آناما،
گؤر نئجه گؤزل آغلار.

آغلایان باشدان آغلار،
کیرپیکدن، قاشدان آغلار.
اوغلو اؤلن آنالار
دورار اوباشدان آغلار.

عزیزیم، گؤزل آغلار،
گؤزه‌لی گؤزل آغلار.
منی آپار آناما،
او منی گؤزل آغلار.

عزیزیم، قازان آغلار،
اود یانار، قازان آغلار.
بئل باتماز، کۆلونگ کسمز،
قبریمی قازان آغلار.