بایاتی

آغاجدا خزل آغلار،
دیبینده گؤزل آغلار.
اوغلو اؤلن آنالار
سرگردان گزر، آغلار.

بو داغدا اوزان آغلار،
درد-غمین یازان آغلار.
غۆربتده جان وئره‌نین
قبرینی قازان آغلار.

باغچا-باغدا گۆل آغلار،
بۆلبول آغلار، گۆل آغلار.
اوغلو اؤلن آنالار
باشا تؤکر کۆل، آغلار.

من عاشیق او یان آغلار،
مارالی سویان آغلار.
یار دردیندن اؤلنی
مزارا قویان آغلار

عزیزی‌یم، سیم آغلار،
ساز اینیلدر، سیم آغلار.
سن اؤلدون، من آغلادیم،
من اؤلسم، بس کیم آغلار؟

یووادا لاچین آغلار،
گؤرن بس نئچین آغلار؟
سن یادیما دۆشنده
باشیمدا ساچیم آغلار.

باغ سالدیم، باغیم آغلار،
بوستانیم، تاغیم آغلار.
ساغسام، اؤزوم آغلارام،
اؤلسم، تورپاغیم آغلار.

آنالار یانار، آغلار،
گۆنونو سانار، آغلار.
دونر گؤی گؤیرچینه،
یوللارا قونار، آغلار.

شفته‌لی دگر، آغلار،
بوداغی ایر، آغلار.
دؤران غم، گۆذران غم،
غم غمه دگر، آغلار.

عزیزیم منی تاپار،
یاد گلر منی تاپار.
هاردان بیر بلا گلسه،
دولانار منی تاپار.

گؤز اۆستونده قاش آغلار،
بولود گلر، یاش آغلار.
بیر ائوده سونسوز اولسا،
اوجاق یانار، داش آغلار.

ائوده بیر آنا یاتار،
اۆرگی یانا یاتار.
بورا بیر ایگید گلیب،
بویانیب قانا، یاتار.

عزیزی‌یم هارایلار،
هر هفته‌لر، هر آیلار.
باش یاستیقدا، گؤز یولدا،
دیلیم دوستو هارایلار.

قاپیدا شانا یاتار،
یان دۆشوب یانا یاتار.
بوردا بیر اوغلان اؤلوب،
بویانیب قانا، یاتار.

بوخاری قوروم اولار،
اود یانار قوروم اولار.
اوغلو اؤلن آنایا
چوخ یامان ظولوم اولار.

او داغ بو داغا باخار،
آراسیننان چای آخار.
چؽخسین منیم گؤزلریم،
سنسیز دۆنیایا باخار.

آپاردیلار، قویدولار،
آغلادیلار، دویدولار.
آغجا سینه‌ن اۆستونه
آغیر ساللار قویدولار.

قلیانی چکه‌نه وئر،
دولدوروب چکه‌نه وئر.
اوغول دردی آغیردی،
آپار گئت، چکه‌نه وئر.

قارداشلار، ها قارداشلار،
یاغیش یاغار، قار باشلار.
جنازم ایری گئدر،
یاپیشماسا قارداشلار

بۆلبوله قونچا گئدر،
بیر الده دولچا گئدر.
تویسوز اؤلن جاوانا
بزکلی خونچا گئدر.