بایاتی

داغ دؤشو تالا یئری،
بۆرج یئری، قالا یئری.
بوندان پیس گۆن اولارمی؟
یار اؤله، قالا یئری.

تئز دولان قاراداغی،
تاپشیر گل، سارا، داغی.
اؤلدوردولر ایگیدی،
چکدیلر یارا داغی.

گؤرونور آزان یئری،
قبرینی قازان یئری.
کور اوللام، بیر ده گؤرسم،
بالا، سن گزن یئری.

آشیقدا قیام داغی،
دۆگونده قیام داغی.
بیر مارال ایتیرمیشم،
اونون داغی‌یام، داغی.

ائله‌می دۆشن یئری،
آتلانیب دۆشن یئری.
گؤز یاشیم اودا دؤنوب،
یاندیریر دۆشن یئری.

من عاشیقم آش داغی،
دولان گل، بیر آش داغی.
ساغالسا هر بیر یارا،
ساغالماز قارداش داغی.

عزیزیم بو گۆن سسی،
گلمه‌ییر بو گۆن سسی.
فرهاد اؤلوب بو داغدا،
گلمیر کۆلونگون سسی.

بو داغلار قارالیبدی،
یاغیبدی، قار آلیبدی.
بو قارانلیق مئشه‌ده،
بیر بوداق سارالیبدی.

آرازا سالدیم تئشتی،
جینگیلده‌مه‌دی، کئشدی.
آناما خبر گئتسین،
آغ گۆنو قارا کئشدی.

آشیق هارادا قالدی؟
گئتدی، هارادا قالدی؟
واختسیز اؤلدون، آی اوغول،
آنان هارادا قالدی.

من عاشیق لالا داغی،
بۆرویوب لالا داغی.
جمیع یارا ساغالار،
ساغالماز بالا داغی.

یئتیم یوخودا قالدی،
یاتدی یوخودا قالدی.
اؤلدو یئتیم آناسی،
بیر آمان خودا قالدی.

عزیزیم، اوودا قالدی،
گؤزلریم اوودا قالدی.
من سندن آیریلاندان
باشیمدا سوودا قالدی.

آغ چوخا آغلی قالدی،
بوغچادا باغلی قالدی.
عزیز نیشانلیم اؤلدو،
اۆرگیم داغلی قالدی.

اۆمیدیم یازا قالدی،
گؤی سولار قازا قالدی.
قیسمتینده بو ایمیش،
خلعتین تازا قالدی.

باغچادا لالام قالدی،
درمه‌دیم، لالام قالدی.
اؤلدون، درددن قورتاردین،
منه ده نالام قالدی.

آمان آمانا قالدی،
حالیم یامانا قالدی.
بالا، سنی گؤرمه‌ییم
آخیر زامانا قالدی.

من اؤلدوم آنام قالدی،
اودوما یانان قالدی.
نه دۆنیادان کام آلدیم،
نه ده نیشانام قالدی.

اووچو بره‌ده قالدی،
پئیکان یارادا قالدی.
آنا، اؤزونو یئتیر،
بالان هارادا قالدی.

داغلاردا قاسیم قالدی،
هایلادیم، سسیم قالدی.
اوغلوما توی ائتمه‌دیم،
اۆرگیمده سیم قالدی.