بایاتی

یایلیغی تیکن اؤلسون،
قؽراغین بۆکن اؤلسون.
من سنه گؤز تیکمیشم،
سنه گؤز تیکن اؤلسون.

بو داغلار قوشا داغلار،
وئریب باش-باشا داغلار.
نه گلن وار، نه گئدن،
دؤنه‌سن داشا، داغلار.

بۆزمه کؤینک بۆزولسون،
اینجه بئلین اۆزولسون.
سیفته گئدن گئجه‌سی
یاردان الین اۆزولسون.

آغ ساچلی پری، داغلار،
هئچ باخمیر بری، داغلار.
یادلارا مسکن اولدون،
بیر اوتان، اری، داغلار.

سو گلدی، ائشیل، داغلار،
عؤموردور بئش ایل، داغلار.
سنده دۆشمن ایزی وار،
گؤز-گؤز اول، دئشیل، داغلار.

قره‌نفیل هاچا بتدیر،
سانا گؤر نئچه بتدیر؟
دۆش بیر من دۆشن درده،
گؤررسن نئجه درددیر.

دوماندیر باشین، داغلار،
بیلینمیر یاشین، داغلار،
قنیمین حاقدان اولسون،
سؤکولسون داشین، داغلار.

الینده هول اوینادار،
جیبینده پول اوینادار،
کۆل باشینا آی جاوان،
قؽز دوروب، دول اوینادار.

جارا گئدن یاردیلار،
قؽزیلگولو دردیلر.
قؽریلسین بئله یاری،
یاری یادا وئردیلر.

آی دوغدو، دۆزه دۆشدو،
قارا زۆلف یۆزه دۆشدو.
فلکین چرخی دؤنسون،
آیریلیق بیزه دۆشدو.

عزیزیم قار، قؽش اولار،
قار یاغار، قار، قؽش اولار.
سونسوزون ایشی گۆجو،
فلکه قارغیش اولار.

من عاشیقم گۆن اۆزو،
دومان توتدو گۆن اۆزو.
دۆشمن بیر درده دۆشسون،
هئچ گؤرمه‌سین گۆن اۆزو.

آشیق دئیر، ساز آنلار،
بۆلبول گۆلو یاز آنلار.
الدن قلمین دۆشسون،
اؤلوم امری یازانلار.

شیروانین آی یاز گۆلو،
آچیبدیر بیاز گۆلو.
گؤزون چؽخسین، آ باغمان،
ووروبدور آیاز گۆلو.

سو گلر، آستا گئدر،
دولانار دوستا گئدر.
ویران قالسین بو یئری،
ساغ گلن خسته گئدر.

گؤرمه‌دی اوزان گۆنو،
ایلقاری پوزان گۆنو.
فالچی، تاسین سؽنایدی
بختیمی یوزان گۆنو.

آرابا باخ، آرابا،
قویون وورار قورابا.
الله بیر ایش ایشله‌دی،
ائویم اولدو خارابا.

باغچادا بار قالانا،
باغبان ساخلار آلانا.
بیر یازیغین گلیرمی
من بیچاره آنانا؟

عزیزی‌یم مرد آدا،
اۆستونه گلدیم دادا.
اؤزون اؤلدون، ترک اولدون،
آدین قالدی دۆنیادا.

من عاشیق باغچا نانا،
باغ نانا، باغچا نانا.
حسرت قالان گؤزلریم،
دویونجا باخ جانانا!