بایاتی

اوجاغی یاخشی قالا،
اودون قوی، یاخشی قالا.
نه اولار بو دۆنیادا،
پیس اؤله، یاخشی قالا.

بیز هارا، بورا هارا،
بیزی سالدیلار تورا.
بیزی تورا سالانی
گئتسین ایمانسیز گورا.

آی دؤنوبدور هیلالا،
حارام دۆشمز حالالا.
نامردین باغچاسیندا
نه گۆل بیتسین، نه لالا.

تنکده واردی قورا،
بیلمه‌دیم، دۆشدوم تورا.
بیزی آیری سالانی
راحت گئتمه‌سین گورا.

آغ چوخا، قارا چوخا،
یار گئییب هارا چؽخا؟
سنه یامان باخانین
گؤزونه یارا چؽخا.

یوخ عاشیق تیکه-تیکه،
کس باغریم تیکه-تیکه.
اؤلنده یار آغلاسین
کفنیم تیکه-تیکه.

قارداشا باخ، قارداشا،
پاپاغین قویوب باشا.
قارداشین دۆشمنلری
دؤنسونلر قارا داشا.

داغ باشی سرین آیاز،
گؤی بولود، سرین آیاز.
ائله نه قادا گلسه،
یاغی‌نین سرینه یاز.

گز دولان یمه‌نی ده،
میصری ده، یمه‌نی ده.
حاق گؤتورسون آرادان،
پیسی ده، یامانی دا.

آراز، آراز، خان آراز،
سولطان آراز، خان آراز!
چایین، چئشمن قوروسون،
منیم تکی یان، آراز!1

گلین گئدک باشکنده،
آیاق گؤتور، آش کنده.
نئجه‌سن بیر آه چکیم،
یاغیش یاغا داش کنده.

شیروانا گئدن گلمز،
او نازیک بدن گلمز.
ویران قالسین یاد اؤلکه،
یار گئدیب، ندن گلمز!

گئجه‌لر آی کئچنده،
بولود تا-تای کئچنده.
من سنه قارغایارام
گۆنوم آه-وای کئچنده.

قره‌نفیلم، قلمسیز،
قراریم گلمیر سنسیز.
یوخونا اود تؤکولسون،
نئجه یاتیرسان منسیز!

قالمادی آزان یئرده،
قبریمی قازان یئرده.
گؤروم قلمین سؽنسین
منه اوخ ووران یئرده.

بیر گئجه وار، بیر گۆندوز،
زۆلفون کۆره‌یه گئن دۆز.
فلک سنسیز عاشیقی
هئچ قویماسین بیر گۆندوز.

مارال دوردوغو یئرده،
بوینون بوردوغو یئرده.
علی سؽنسین اووچونون
سنی ووردوغو یئرده

قوشلار قاناد اۆسته‌دی،
آتما، قاناد اۆسته‌دی.
الین قوروسون، فلک،
اوغلان موراد اۆسته‌دی.

ائله‌می کرم دۆزه،
دۆشوبدور کرم دۆزه.
باشچین اؤلسون، آی دورنا،
داغیلسین فرن دۆزه.

باغیندا گیلاس دگدی،
یئتیشدی، گیلاس دگدی.
الین قوروسون، اووچو،
آتدیغین نه راست دگدی.