بایاتی

بیزده اولان گؤزللر،
باغ-باغچانی بزرلر.
نیشان گۆنو سۆفره‌یه
شیرین شربت دۆزرلر.

من عاشیقم گۆن گلیر،
آی دولانیر، گۆن گلیر.
گؤزلرین آیدین اولسون،
نیشانلین بو گۆن گلیر.

داغلار باشی ایشیقدیر،
گۆن داغا یاراشیقدیر.
قاینانام منی سئومیر،
اوغلو منه آشیقدیر.

عزیزیم یول اۆستودور،
ائویمیز یول اۆستودور.
بیر سحر گل، بیر آخشام،
گؤرن دئسین دوستودور.

ایستکانین قانلیدیر،
توخونما، درمانلیدیر.
بوردا بیر یار سئومیشم،
آناسی شیروانلیدیر.

مهله‌ده بیتر سؤیود،
یارپاغی گؤمگؤی سؤیوت.
کیچیکجه بیر یار سئودیم،
خودام، سن اؤزون بؤیوت.

دور گئت، خوروز بانیدیر،
ائویمیزین یانیدیر.
باختیما بیر یار دۆشوب،
بئهیشتین غؽلمانیدیر.

ناشی بیلمز سؤزونو،
کور ائیله‌یر گؤزونو.
آنا بالا اوجوندان
اودا یاخار اؤزونو.

بو دۆز یول ائل یولودور،
گرده‌نین تئل یولودور.
باشیم بولود اویناغی،
گؤزلریم سئل یولودور.

من عاشیق چندن اؤترو،
دوماندان، چندن اؤترو.
اونون بوردا نیشی وار،
گلمیشدی سندن اؤترو.

گمیده وار تالاشا،
آستا سۆر، دگر داشا.
قوهوم-قارداش یؽغیلسین،
گلین گلیر قارداشا.

عاشیقم اوووم آی قؽز،
چاخماغیم، قوووم آی قؽز.
یولداشیما گلسه‌نه،
باشینا دؤنوم، آی قؽز.

قاپیمیزدا جۆت قالاق،
قؽزین بیرین بیز آلاق.
قارداشینا دئمیشیک،
آناسینا یالواراق.

آشیق سالاتین یئری،
ساللان، سالاتین یئری.
سنه نیشان گلیبدی،
گل گئی خالاتین یئری.

یایلیغی وئردیم سیزه،
اوینایاندا سال اۆزه.
اوینا، قایتار یایلیغی،
گؤندریم قاراگؤزه.

قؽزیم قؽزلار سوناسی،
وار قؽزیل توماغاسی.
قؽزیما ائلچی گلیب،
یئددی اویماق آغاسی.

بولاغین باشی ایله،
دیبی‌نین داشی ایله.
گلین سئیره چؽخیبدیر
قوهوم-قارداشی ایله.

گؤزل یاشینا گرک،
سۆرمه قاشینا گرک.
توی گۆنو تیرمه شالی
اؤرته باشینا گرک.

کمر باغلا بئلینه،
شربت وئریم الینه.
سن گلینیم اولاندا
خؽنا قویوم تئلینه.

بو داغدا اینجی منم،
دۆرر منم، اینجی منم.
سن بو تویدا اویناسان،
من سندن اینجیمنم.