بایاتی

قاش-گؤزونو سۆزه‌نی،
بئله اینجی دۆزه‌نی،
یارب، سن تئز سوووشدور
ایکی حسرت گزه‌نی.

آغ دوه دۆزده قالدی،
یۆکو تبریزده قالدی.
اوغلانی درد آپاردی،
درمانی قؽزدا قالدی.

اؤلدورر بو درد منی،
دوغرایار بند-بند منی.
یاریم وفالی اولسا،
آختارار کند-کند منی.

آشیق یمنده قالدی،
بۆلبول چمنده قالدی.
بو درد منی اؤلدوردو،
درمانی سنده قالدی.

ائله‌می درده منی،
قول ائله مرده منی.
او گئدن یارین قهری
سالیبدی درده منی.

باغچادا گۆلوم یاندی،
سۆسن، سۆنبولوم یاندی.
خومار گؤزلوم، سو گتیر،
آغزیمدا دیلیم یاندی.

آی قؽز، آی قؽز، آماندی،
الینده ظفراندی.
عهد-پئیمان ائله‌میشیک،
بو گۆن وعده‌ن تامامدی.

کره یاغین تورتاسی،
قؽزیل کمر اورتاسی.
الله مورادین وئرسین
گلن بازار ائرته‌سی.

دولایی گل، دولایی،
سۆپورموشم سارایی.
تویوموزا آز قالیب،
گؤزلرم تزه آیی.

آشیق گلر، یانار هئی،
دردی جاندا یانار هئی.
ترلان اوچار هاوادان،
اووون آلیب، ائنر هئی.

آراخچی‌نین هاشیمی،
هارا قویوم باشیمی.
منی سنه وئرمزلر،
تؤکمه گؤزون یاشینی.

آمان فلک، آخ فلک!
چؽخ باجادان باخ، فلک!
منه ائلچی گلمه‌سه،
گئت ائوینی یؽخ، فلک.

قؽزیل اۆزوک میانی،
دورماز بارماغین قانی.
بو گۆن-صاباح گله‌جک
مهله‌میزین سولطانی.

عزیزیم قارمی گؤرک،
داغلاردا قارمی گؤرک؟
اؤزو پیس اوغلان دئییل،
وفاسی وارمی گؤرک؟

بو ساریشماق زامانی،
آی جانیمین ایمانی.
بیرجه گؤرمک ایستردیم
اوزاقداکی جاوانی.

ساللاندی گلدی گؤیچک،
باشیندا گۆللو لچک.
الینده بیر دسته گۆل،
اۆزو گۆلدن ده گؤیچک.

میس قازانین پاخیری،
اوغلان، قایتار ناخیری.
غم چکمه، گؤزل ایگید،
قؽز سنیندیر آخیری.

تامبورون تئلی نازیک،
قول اۆسته جیفت بیلرزیک.
یادیگارا وئرمیشم
قؽرمیزی قاشلی اۆزوک.

عزیزیم اولما آسی،
کئچیر بو غملی یاسی.
آغلیم، هوشوم آپاردی،
گئدن یارین سئوداسی.

بو گۆن بایرام ائلریک،
باغدا سئیران ائلریک.
یار بایراما گلمه‌سه،
بایرامی ترک ائلریک.