بایاتی

باشیمدان ساچاق دۆشدو،
بیلمه‌دیم هاچاق دۆشدو.
تانری بیر درده سالدی،
حکیمیم قاچاق دۆشدو.

داغ دؤشونده ناشی یوخ،
اتگینده داشی یوخ.
بوردا بیر باجی اؤلوب،
یانیندا قارداشی یوخ.

دده‌م اؤیو یاس اؤیو،
دده‌م تیکدی یاس اؤیو.
قارداش-قارداش دئمکدن،
اولدوم اوجاخ کؤسؤیو.

من عاشیق اۆزوموم یوخ،
باغیم وار، اۆزوموم یوخ.
سن کی بئله تئز گئتدین،
فیرقته دؤزوموم یوخ.

ایتیرمیشم سؤزومو،
اؤلورم، باس گؤزومو.
عزرائیل، بیر آمان وئر،
یارا دئییم سؤزومو.

عزیزی‌یم آی قارداش،
قاشین اوجو یای قارداش.
کاش من اؤزوم اؤله‌یدیم،
دئمه‌یه‌یدیم، وای قارداش.

عزیزیم بئله گۆنو،
دۆشمنین بئله گۆنو.
اؤله‌یدی آنان، اوغول،
گؤرمه‌یدی بئله گۆنو.

شاماخی بازار ایمیش،
اوخویان یازار ایمیش.
گلدی گۆلوم سولدوردو،
نه یامان آزار ایمیش.

قویون باخار داغلارا،
سئلتک آخار داغلارا.
آراندان دؤنن سۆرو
یایدا چؽخار داغلارا.

داغلاری، دره‌لری،
داشلاری، بره‌لری.
اوتوروب قویون ساغین،
بول اولسون کره‌لری.

گؤزل کئچسین حالینیز،
آرتسین قارامالینیز.
آوانینیز یوخ اولسون،
توخ گلسین چوبانینیز.

ننم، او خاللی کئچی،
ممه‌سی باللی کئچی.
اوجا قایا باشیندا
توتوبدو یاللی کئچی.

سایا گلدی، گؤردونوز،
سلام وئردی، آلدینیز.
آلنی تپل قوزونو
سایاچی‌یا وئردینیز.

ننم، آ قاتار کئچی،
قایادا یاتار کئچی.
قؽشی سویوق گلنده
بالانی آتار کئچی.

قویونون یۆزو گلدی،
دولاندی دۆزو، گلدی.
چوبانین قوجاغیندا
بیر اکیز قوزو گلدی.

قؽزلارا جئهیز آغی،
چوبانا چاریق باغی،
قاریلار توتار یاغی،
گلین یئیر قایماغی.

قویونون اۆچو گلدی،
دولاندی کؤچو گلدی.
سۆرونون قاباغیندا
بیر آلا کئچی گلدی.

ننم، قویونون آغی،
دولانیب گلدی داغی.
قؽرپار قاراقیاغی،
ایچر سرین بولاغی.

توت قویونون بئلینی،
اله گلمیر یئلینی.
بیر دویونجا گؤره‌یدیم
اونو ساغان گلینی.

ننم، قویونون آغی،
دولاندی گلدی داغی.
چوبانا چاریق باغی،
قؽزلارا جئهیز آغی.