منو
×
باش صفحه
سون آرتیریلمیشلار
سئویلمیشلر
بلاگ
مین سؤزه یاردیم
مین سؤز
باش صفحه
سون آرتیریلمیشلار
سئویلمیشلر
بلاگ
مین سؤزه یاردیم
بایاتی
مین سؤز
ائل ادبیاتی
بایاتی
گؤللرینده اۆزرلر،
ترلان کیمی سۆزرلر.
سنه تای اولا بیلمز،
یۆز اوبالار، یۆز ائللر.
قولومدا یارام واردیر،
باشیمدا بلام واردیر.
غۆربت آدی چکمهیین،
غۆربتده آنام واردیر.
گۆن چؽخار، داغ گۆن گؤرر،
بویلانار باغ گۆن گؤرر.
غۆربتده جان چۆرودن،
وطنده آغ گۆن گؤرر.
آی قؽز، آدین هئچ اولدو،
قوربان دئدین، قوچ اولدو.
غۆربت ائل، یارا حسرت،
جاوان عؤمروم پوچ اولدو.
سوسامیشام، سو یوخدو،
سو چوخدو، وئرن یوخدو.
دۆشموشم غریبلییه،
دردیمی بیلن یوخدو.
داغ باشیندا قارا باخ،
اۆستون آلان سارا باخ.
عالم جنّته دؤنسه،
منه خوشدور قاراباغ.
اودا سالدین اؤزونو،
کور ائیلهدین گؤزونو.
غریبین دردی چوخدو،
کیمه دئسین سؤزونو؟
غریبهم، وطنیم یوخ،
بو یولدان اؤتنیم یوخ.
دۆشدوم درین دریایا،
الیمدن توتانیم یوخ.
الیمدن بؽچاق دۆشدو،
بیلمهدیم هاچاق دۆشدو.
ویران قالسین غریبلیک،
یار مندن قاچاق دۆشدو.
باغبان، بارین دردی چوخ،
دردی یئره سردی چوخ.
یاد ائللرده اینسانین،
درمانی یوخ، دردی چوخ.
یول گئدیر اوردوبادا،
سالماسدان اوردوبادا.
سرکرده قوچاق اولسا،
هئچ گئتمز اوردو بادا.
من عاشیق دالداسینا،
قونچا گۆل دالدا سؽنا.
نامرد ائله نامرددی،
اۆزو نه، دالداسی نه؟
ائل باتیر غم دریادا،
کیمه گئدیم من دادا؟
ایگید دؤیوشده اؤلسه،
آدی قالار دۆنیادا.
داغلار باتیبدیر قارا،
اووچو دۆشوبدور دارا.
اۆزونه گۆلن دوستون،
قاییت بیر قلبین آرا.
یار گلیر بدؤی آتدا،
آرخالیغی گئی، قاتدا.
ایگید اوغول بد گۆنده.
یا آتدا، یا یئر آلتدا.
عزیزیم قلبی نارا،
توتوشدو قلبی نارا.
اۆزده دوست دئینلرین
گئت اؤیرن، قلبین آرا.
عزیزیم نه قارییا،
خاللارین نه قارییا؟
مرد ایگیدین همدمی،
نه اؤله، نه قارییا.
عزیزیم گۆلن اولسا،
گؤز یاشین سیلن اولسا،
دوست، آشنالیق یاخشیدی،
قدرینی بیلن اولسا.
بۆلبول اوچار بو دالا،
قونار او دال، بو دالا.
دوست سؤزون آچیق دئیر،
دۆشمن دئیر بودالا.
قؽزیلگولو خار اولسا،
دؤرد یانیندا سار اولسا.
قوچ ایگید هئچ دورارمی،
یاری یادلارا قالسا؟
«
‹
5
6
7
8
9
›
»